Vetëvendosje: Nëse Supremja refuzon kërkesën tonë, do t’i drejtohemi Gjykatës Kushtetuese
Lëvizja Vetëvendosje ka dorëzuar sot ankesën në Gjykatën Supreme në lidhje me moscertifikimin e listës së tyre për zgjedhjet e 14 shkurtit.
Blerim Sallahu, përfaqësuesi ligjor i VV-së, ka shprehur bindjen se Supremja do të vendos në favor të tyre.
“Ankesa e VV ka argumente jashtëzakonisht të qëndrueshme për të rrëzuar një vendim anti-kushtetues dhe anti-universal për të drejtën për të kandiduar si deputet i Lëvizjes Vetëvendosjes”, ka deklaruar Sallahu.
Ai ka thënë se nëse ndodh e kundërta, do të ankohen edhe në Gjykatën Kushtetuese.
“Ka prova fakte argumente nënligjore për të nxjerrë vendim në favor të Vetëvendosjes. Supremja do të marrë vendim në favor të VV. Nëse ndodh e kundërta, jemi në dy rrafshe, në rrafshin politik ku organet e VV-së do të vendosin më tutje se çka do të bëjnë dhe patjetër do t’i drejtohemi Gjykatës Kushtetuese për të kërkuar masë të përkohshme për pezullimin e vendimit të tillë. Por unë sërish theksoj se Gjykata Supreme në asnjë variant nuk do të merr vendim kundër moscertifikimit të pesë kandidatëve të Lëvizjes Vetëvendosje për deputet për faktin sepse ata kanë kryer disa vepra penale që nuk kanë kurrfarë veprash juridike që e përcakton edhe Kodi Penal i Republikës së Kosovës”, tha Sallahu.
Kujtojmë se 5 kandidatët nga VV-ja që nuk plotësojë kushtet për certifikim sipas Panelit Zgjedhor për Ankesa dhe Parashtresa janë Albin Kurti, Albulena Haxhiu, Liburn Aliu, Bajram Mavriqi dhe Labinotë Deni-Murtezi
