LAJMI I FUNDIT

Vetëvendosje bën thirrje për vaksinim: Bashkë ia dalim

Lëvizja Vetëvendosje u ka bërë thirrje qytetarëve që të vaksinohen kundër koronavirusit, duke thënë se vetëm ky proces ruan shëndetin publik.

LVV, përmes një postimi në faqen zyrtare në Facebook, ka thënë se Qeveria tashmë ka marrë masat e nevojshme për frenuar përhapjen e virusit, por se kjo betejë është e përbashkët dhe si e tillë edhe duhet luftuar.

“708,327 doza të vaksinës kundër virusit COVID-19 janë administruar deri më tani. Numri i të vaksinuarve është në rritje dhe tashmë është kaluar shifra e 100 mijë vaksinimeve në javë, por thirrja për t’u vaksinuar duhet vazhduar. Vetëm vaksinimi na mbanë të shëndetshëm e të fortë ndaj virusit, andaj ftoni të gjithë të afërmit e shoqërinë që ende nuk kanë caktuar terminin për vaksinim, ta bëjnë një gjë të tillë”.

“Qeveria tashmë ka marrë masat e nevojshme për ta kufizuar shpërndarjen e virusit dhe ulur numrin e infektimeve. Është shtuar edhe numri i punonjësve shëndetësorë dhe i hapësirave për mjekimin e të infektuarve. Mënyra se si kontribuojmë në këtë betejë të përbashkët është duke mbajtur maskën, ruajtur distancën dhe duke u kujdes për higjienën. Bashkë ia dalim!”.

Masat e reja që mori Qeveria Kurti kanë hyrë në fuqi nga 20 gushti.