Gëzim Kelmendi

Vetëm Gëzim Kelmendi ka talent për ta interpretuar në mënyrë kaq banale rastin e Mrika Nikçit

Kryetari i Partisë Fjala, Gëzim Kelmendi së fundi në një postim skandaloz e shpërfaq banalitetin e tij duke lënë fajtorë, të gjithë, përveç sulmuesve seksualë.

Kelmendi ka bërë një shkrim në Facebook, të titulluar “Çka na tregon sulmi seksual ndaj Mrika Nikqit?”.

Ish-deputeti i Kuvendit të Kosovës përmend si arsye për sulmet seksuale mësimin në shkolla fillore, për komunitetin e LGBTI, filmat që shfaqen nëpër televizione, Kodin Civil të propozuar për miratim në Kuvend, takimet e kryeministrit Kurti e presidentes Osmani.

Ai thotë se në Kosovë, nuk mësohet për fenë e Zotit dhe shkelen të drejtat e vajzave me mbulesë, përkundër mobilizimit të madh që u bë në të gjithë vendin, që atyre t’u lejohet shkollimi.

Por askund në postimin e tij, Gëzim Kelmendi s’i përmend sulmuesit seksualë, fajtorët e vërtetë për të gjitha këto raste.

Postimi i plotë pa ndërhyrje i Kelmendit:

Çka na tregon sulmi seksual ndaj Mrika Nikqit?

Në një shtet ku në klasën e VI- të shkollës fillore mësojnë për dashurinë si vlerë mes mashkullit me mashkull dhe femrës me femër, në një shtet ku në orën 20:00 në televizionin publik shfaqen filma erotik, në një shtet ku kryeministri dhe presidentja sjellin ligjin që lejon martesa mes gjinisë së njejtë, në një shtet ku kryeministri dhe presidentja ma shumë takohen me George Sorosin dhe djalin e tij se sa që takohen me liderët shqiptarë të Shqipërisë, Maqedonisë dhe Kosovës Lindore, në një shtet ku nuk mësohet për Fenë e ZOTIT dhe për edukimin fetar, në një shtet ku shtypen të drejtat e vajzave me mbulesë, atëherë edhe sulmet seksuale ndaj vajzave mund të rriten.

Dhe ashtu është, sulmi i fundit seksual ndaj alpinistes Mrika Nikqit, sikur edhe shumë sulme të tjera seksuale, dhunime dhe ngacmime, na tregojnë që shteti ynë i dashur Kosova po përballet me situatën më të rëndë që nga përfundimi i luftës.

Udhëheqësit e shtetit të Kosovës dhe udhëheqës të institucioneve të ndryshme, nuk duhet vetëm ta dënojnë me fjalë këtë akt të shëmtuar dhe aktet e tjera, por duhet të veprojnë.

Nuk duhet të merren vetëm me pasojat, por duhet edhe me shkaqet.

Shkaqet nuk trajtohen ashtu si na mëson, Sorosi, masonizmi, egoja, lakmia për pushtet, arroganca dhe mendjemadhësia.

Por shkaqet trajtohen ashtu si na mëson ZOTI.

Gëzim Kelmendi