Vazhdojnë ditët e këqija për Real Madridin, mposhtet nga Alavesi në “Santiago Berbabeu”

Real Madridi ka pësuar humbje nga Alavesi në La Liga. Ndeshja e zhvilluar në Santiago Bernabeu, përfundoi me fitore të mysafirëve 2-1.

Në minutën e pestë, Alavesi kaloi në epërsi përmes sulmuesit Lucas Perez. Ai nga pika e bardhë qëlloi saktë për 1-0.

Me të filluar pjesa e dytë, portieri Courtois bëri një gabim amatoresk, duke ia dhënë topin Joseluit, dhe ky me goditje shënoi për rezultatin 2-0.

Katër minuta para fundit të ndeshjes, Casemiro pas një tollovie e gjeti portën dhe shënoi për golin e vetëm të skuadrës së tij.

Kjo është ndeshja e tretë radhazi pa fitore për Real Madridin.

Me këtë humbje, skuadra e Zinedine Zidane renditet e katërta në tabelë me 17 pikë, ndërsa Alavesi në të nëntën, me 13 sosh.