Presidenti i SHBA-së, Donald Trump, kritikoi sërish presidentin rus Vladimir Putin.
“Ajo që Vladimir Putin nuk e kupton është se nëse nuk do të isha unë, Rusisë do t’i kishin ndodhur tashmë shumë gjëra shumë të këqija, dua të them VËRTETË KEQ. Ai po luan me zjarrin”, shkroi Trump në rrjetin social “Truth Social”, transmeton Ballkani.info.
Qëndrimet e Trump ndaj Putinit janë luhatur që nga fillimi i mandatit të tij. Ndonëse herë pas here bënte kritika të ashpra dhe konsideronte sanksione, ai foli edhe për mundësitë e reduktimit të barrierave tregtare dhe tërheqjes së investimeve amerikane në Rusi.
Por të dielën, ai ishte jashtëzakonisht i mprehtë. “Unë e njoh atë për një kohë të gjatë, ne kemi pasur gjithmonë një marrëdhënie të mirë, por tani ai dërgon raketa në qytete dhe vret njerëz, dhe kjo nuk më pëlqen aspak. Ndërsa ne po flasim, ai dërgon raketa në Kiev dhe qytete të tjera. Nuk më pëlqen fare kjo”, tha Trump në atë kohë.
Wall Street Journal, duke cituar burime të afërta me Trump, raportoi se Trump po konsideron vendosjen e sanksioneve të reja ndaj Rusisë pasi ai është gjithnjë e më i frustruar nga sulmet e vazhdueshme të Rusisë ndaj Ukrainës dhe përparimi i ngadaltë i bisedimeve të paqes.
Sipas një burimi, sanksionet nuk kanë gjasa të përfshijnë masa të reja kundër bankave, por janë duke u shqyrtuar opsione të tjera për t’i bërë presion Presidentit rus Vladimir Putin për të rënë dakord për lëshime, duke përfshirë një armëpushim 30-ditor të mbështetur nga Ukraina, të cilin Rusia deri më tani e ka refuzuar me vendosmëri. /Ballkani.info/







