Një kongresmen amerikan ka nominuar Presidentin Donald Trump për Çmimin Nobel për Paqen, pasi ai ndërmjetësoi një armëpushim midis Izraelit dhe Iranit, raporton Fox News.

Përfaqësuesi Buddy Carter i Xhorxhias i shkroi komitetit të Nobelit se Trump luajti një “rol të jashtëzakonshëm dhe historik” në përfundimin e “konfliktit të armatosur midis Izraelit dhe Iranit dhe në parandalimin e sponsorit më të madh shtetëror në botë të terrorizmit nga marrja e armës më vdekjeprurëse në planet”, transmeton Ballkani.info.

Trump deklaroi fundin e “Luftës 12-ditore” vonë dje, me armëpushimin që hyri në fuqi këtë mëngjes. Ai i dha fund një konflikti që kishte zgjatur pak më shumë se një javë, pasi Izraeli nisi për herë të parë një sulm ndaj Iranit, duke pretenduar se Teherani ishte rrezikshëm afër marrjes së armëve bërthamore.

“Ndikimi i Trump ishte vendimtar”

Të dy vendet më pas shkëmbyen sulme me raketa për ditë të tëra, dhe gjatë fundjavës SHBA-të kryen sulme ajrore në tre objekte kryesore bërthamore iraniane. Irani u përgjigj duke qëlluar raketa në bazën ajrore amerikane në Katar dje, por njoftoi zyrtarët amerikanë dhe katarë për sulmin paraprakisht dhe nuk pati viktima.

“Ndikimi i Presidentit Trump ishte kritik në arritjen e një marrëveshjeje të shpejtë që shumë e besonin të pamundur. Trump gjithashtu ndërmori hapa të guximshëm dhe vendimtarë për të ndaluar ambiciet bërthamore të Iranit dhe për të siguruar që sponsori më i madh i terrorizmit në botë të mos mund të sigurojë armë bërthamore”, shkroi Carter në letrën e tij.

Carter deklaroi se lidershipi i Trump gjatë krizës “mishëron pikërisht idealet që Çmimi Nobel për Paqen kërkon të njohë: ndjekjen e paqes, parandalimin e luftës dhe promovimin e harmonisë ndërkombëtare. Në një rajon të shënuar nga armiqësitë historike dhe paqëndrueshmëria politike, një përparim i tillë kërkon si guxim ashtu edhe qartësi”.

Emërimi i Trump vjen në një kohë kur paqja në Lindjen e Mesme mbetet shumë e brishtë, dhe vetëm disa orë pasi u nënshkrua armëpushimi, Izraeli akuzoi Iranin për shkeljen e saj, gjë që Teherani e mohoi.