Foto
Transformimi i sheshit “Xhorxh Bush”, Rama: Promovon stil të jetës së shëndetshme
Kryetari i Prishtinës, Përparim Rama, pas prezantimit të projektit për tranformimin e sheshit “Xhorxh Bush”, ka thënë se kjo gjë reflekton nevojat e qytetarëve si dhe sipas tij, promovon një stil të jetës së shëndetshme, me shumë gjelbërim dhe ajër të pastër..
Rama përmes një postimi në Facebook ka ritheksuar se “Xhorxh Bush” do të lidhet me shumë pjesë të kryeqytetit dhe në qendër do të ketë tri platforma.
“Bulevardi i Kryeqytetit, do të shndërrohet një hapërsirë urbane bashkëkohore e cila reflekton nevojat e qytetarëve, promovon një stil të jetës së shëndetshme, me shumë gjelbërim dhe ajër të pastër. “Xhorxh Bush” do të lidhet me shumë pjesë të kryeqytetit dhe në qendër do të ketë tri platforma”, ka shkruar ai.
Rama tutje shkroi se sheshi do të jetë përplot jetë dhe u shpreh se ideja është që këto sheshe të jenë të qasshme për të gjitha moshat.
“Njëkohësisht, projekti synon të rivlerësojë trashëgiminë arkitektonike të Prishtinës duke bërë protagonistë të projektit Hotelin Grand, ndërtesën e RTK, Bibliotekën Universitare “Pjetër Bogdani” dhe Katedralen “Nënë Tereza”, ndërtesa të cilat shihen si përbërësit kryesorë të skenografisë urbane në këtë ndërhyrje”.
“Sheshi do të jetë përplot jetë dhe ideja është që këto sheshe të jenë të qasshme për të gjitha moshat. Gjithashtu do të ketë hapësirë për artistët që të krijojnë një Prishtinë të transformueshme. Te pjesa e Katedrales, për momentin është e rrethuar me një muri të vogël dhe ne kemi propozuar që të hapet dhe të jetë e qasshme për të gjithë qytetarët, në mënyrë që të mos t’i shohim këto monumente të rrethuara dhe të mos jenë të cenueshme për qytetarët”, shkroi tutje Rama.
