TOXIC Records janë kualifikuar në finale të Albanians Got Talent, duke dëshmuar se edhe një grup i pavarur, pa mbështetje institucionale apo struktura të mëdha prapa vetes, mund të arrijë në skenat më të mëdha përmes punës dhe besimit në vizionin e vet.
Si një kolektiv i ndërtuar nga zero, TOXIC Records sollën në këtë format hip-hop, beatbox dhe kulturë urbane, të prezantuara me seriozitet artistik dhe identitet të qartë. Çdo performancë ishte rezultat i përgatitjes së gjatë, bashkëpunimit si grup dhe dëshirës për të treguar se kultura urbane ka vend dhe peshë në çdo skenë.
Ky kualifikim merr edhe më shumë rëndësi duke qenë se grupi është në vitin e parë si formacion zyrtar, duke e bërë këtë arritje një dëshmi të nivelit artistik dhe organizimit që kanë ndërtuar në një kohë të shkurtër.
Finalja e Albanians Got Talent do të mbahet në fillim të janarit, ku fitorja do të vendoset ekskluzivisht nga vota e publikut. Ky është momenti kur mbështetja e secilit bëhet vendimtare — për të çuar deri në fund këtë rrugëtim dhe për ta sjellë fitoren në Kosovë.







