Një tjetër video është publikuar nga sulmi terrorist që shokoi jo vetëm Austrinë mbrëmjen e shkuar.

Ishin nëntë minuta që ndryshuan gjithçka të hënën në mbrëmje në Vjenë.

Rreth orës 8.00, policia mori dhjetëra telefonata në numrin e urgjencës për krisma në rajonin e Seitenstettengasse në qendër të qytetit.

Sipas dëshmitarëve, disa burra po qëllonin me armë të gjata ndaj kalimtarëve.

Një operacion i madh nisi. Popullsisë iu kërkua që të evitonte zonën dhe të mos dilnin jashtë.

Menjëherë pas krismave, personi i armatosur rëndë u pikas nga një patrullë oficerësh dhe pati një shkëmbim zjarri, siç shihet në video.

Një oficer policie u plagos në këmbë.

Në orën 8.09 minuta, njësia speciale WEGA e gjeti agresorin në sheshin Ruprechtsplatz. Ai kishte një kallashnikov, një pistoletë dhe një thikë mashetë.

Në trup kishte një jelek vetëvrasës, por më vonë u mësua se ishte imitim.

Policia qëlloi disa herë në drejtim të tij, në përpjekje për ta ndaluar.

20-vjeçari vdiq në vend nga plagët.

Më herët ai kishte qëlluar mbi kalimtarët dhe oficerët. Gjatë nëntë minutave, dy gra dhe dy burra u vranë prej tij, kurse 22 të tjerë u plagosën, disa rëndë.