Zyrtarët policorë thonë se ka “disa viktima” nga të shtënat pranë një sinagoge në Pitsburg të Shteteve të Bashkuara.
Komandanti i Policisë, Jason Lando u tha gazetarëve se të shtëna janë raportuar në afërsi të sinangogës “Tree of Life” që gjendet në lagjen Squirrel Hill.
“Jemi duke e vëzhguar situatën. Është e domosdoshme që fqinjët dhe komuniteti që gjendet përreth sinagogës Tree of Life të qëndrojnë në shtëpitë e tyre. Mos dilni jashtë”, ka thënë zëdhënësi Jason Lando.
Në kohën kur ndodhën të shtënat, në sinagogë, sipas një dhënave të publikuara në uebfaqen e këtij istitucioni, ka qenë duke u zhvilluar një shërbim fetar, raporton BBC.
Presidenti i Shteteve të Bashkuara, Donald Trump ka shkruar në Twitter se po përcjell situatën në Pensilvani, duke iu bërë thirrje njerëzve që të shmangin zonën Squirrel Hill.
Departamenti për Siguri Publike i Pitsburgut ka shkruar në Twitter se “një sulmues aktiv” është raportuar se gjendet në zonë dhe u ka bërë thirrje njerëzve që të shmangin zonën.







