Deputeti i PDK-së, Abelard Tahiri në Interaktiv të KTV-së, ka thënë se PDK-ja s’ka vota për Qeverinë Hoti.

“Asnjëherë. Asnjë votë e PDK-së nuk do të shkojë për këtë qeveri”, ka thënë ai, i pyetur nëse ndonjë deputet i PDK-së mund ta votojë Qeverinë Hoti.

Ai po ashtu ka treguar që posa të krijohen kushtet, PDK-ja është për zgjedhje.

“Në momentin që e shpallim fitoren në luftën kundër COVID-19, nuk mendoj se ka arsye që të vazhdojë kjo Qeveri”, ka thënë ai, duke shtuar se për zgjedhje nuk ka nevojë të shkohet tek presidenti Thaçi, por se “ne thjeshtë e rrëzojmë Qeverinë”.

“Ne normalisht që do të synojmë t’i bëjmë numrat për rrëzimin e Qeverisë, por në asnjë rrethanë nuk do të bëhemi pjesë e agjendës së LVV-së”, ka thënë Tahiri.

Ai po ashtu i ka quajtur “qesharake” veprimet e Ministrit në detyrë të Financave.

“Aq të shpeshta janë skandalet e kësaj Qeverie, saqë po i harrojmë ato që kanë ndodhur para dy javë”, ka thënë ai.

Sa i përket partisë së tij, ai ka thënë se PDK-së ia ka dhënë verdiktin populli dhe tani është partia e tretë. Ka vazhduar se partia e tij është në opozitë dhe tani është në gjendje të flasë për “ata që po e qeverisin vendin”.

Ai i është referuar deklaratave të ministrit Bislimi për uljen e papunësisë.

“Gjendja është gjithkah e rëndë, por tek ne jo”, ka ironizuar ai, duke shtuar se debati në këtë drejtim “është i gjërë dhe se PDK-ja është partia më konstruktive në këtë periudhë”.

Tahiri ka analizuar qasjen e partive në parlament. Ka thënë se ka “çoroditje” të veprimeve.

“Asnjë rrethanë PDK-ja nuk do të jetë pjesë e asnjë qeverie që do të bëhet në të ardhmen, por ne nuk kemi hequr dorë nga politikbërja”, ka thënë Dehari.

Paraprakisht, Tahiri, ka kërkuar që Kuvendi t’i mbështesë dy projekt-ligjet e partisë së tij.