Jens Stoltenberg
Stoltenberg falënderon von der Leyen për punën e përbashkët në stabilizimin e Ballkanit Perëndimor
Sekretari i Përgjithshëm Jens Stoltenberg është takuar me presidenten e Komisionit Europian, Ursula von der Leyen, derisa po merrte pjesë në një takim sot me Kolegjin e Komisionerëve të BE-së në Bruksel. Ai falënderoi presidenten von der Leyen se është një forcë shtytëse pas partneritetit NATO-BE.
Ai tha se të dyja organizatat kanë shumë të përbashkëta, ndajnë të njëjtat vlera dhe përballen me të njëjtat sfida.
Stoltenberg theksoi se NATO dhe BE kanë bërë më shumë së bashku këtë vit, duke përfshirë punën drejt stabilitetit të qëndrueshëm në Ballkanin Perëndimor, trajtimin e dezinformimit dhe avancimin e partneritetit të tyre strategjik në fusha si lëvizshmëria ushtarake, kibernetike dhe hapësira.
Sekretari i Përgjithshëm tha se të dyja organizatat i dërguan një mesazh të fortë Presidentit rus Putin se “ne do të qëndrojmë pranë Ukrainës për aq kohë sa të duhet”.
“NATO dhe BE nënshkruan në janar një deklaratë të re të përbashkët për të adresuar një gamë më të gjerë çështjesh, duke përfshirë rritjen e konkurrencës gjeostrategjike, elasticitetin dhe mbrojtjen e infrastrukturës kritike. Ata ngritën gjithashtu një Task Force NATO-BE për Rezistencën e Infrastrukturës Kritike për të reduktuar dobësitë dhe varësitë nga regjimet autoritare si Rusia dhe Kina; dhe për të rritur elasticitetin e zinxhirëve të furnizimit dhe teknologjisë. Sekretari i Përgjithshëm tha se lufta në Ukrainë tregon nevojën për të rritur prodhimin industrial të municioneve kryesore dhe përshëndeti përpjekjet e BE-së për të rritur kapacitetin e prodhimit dhe prokurimin e përbashkët”, thuhet në njoftimin e NATO-s.
Stoltenberg tha se ndërsa paqëndrueshmëria rritet me luftërat brutale në Ukrainë dhe Lindjen e Mesme, kërcënimin e vazhdueshëm të terrorizmit, një krizë klimatike dhe regjime autoritare që kërcënojnë rendin ndërkombëtar, “ne kemi nevojë për institucione të forta si NATO dhe Bashkimi Europian.
Ai theksoi se së bashku, Europa dhe Amerika e Veriut mund të mbrojnë vlerat tona demokratike, t’i “mbajnë njerëzit tanë të sigurt dhe kombet tona të forta”.
