Shtetet e Bashkuara kanë vendosur sanksione ndaj Antal Rogan, një nga bashkëpunëtorët më të afërt të kryeministrit hungarez Viktor Orban, për korrupsion të dyshuar, njoftoi Departamenti Amerikan i Thesarit.
Qeveria në Budapest njoftoi se do ta kundërshtonte këtë vendim pasi presidenti i sapozgjedhur amerikan Donald Trump të merrte detyrën, transmeton Ballkani.info.
Kryeministri Viktor Orban, i cili është në pushtet që nga viti 2010, ka qenë shpesh në shënjestër të akuzave për korrupsion dhe nepotizëm. Marrëdhëniet midis Budapestit dhe Uashingtonit janë përkeqësuar më tej gjatë mandatit të Joe Biden, pjesërisht për shkak të lidhjeve të ngushta të Orbanit me Moskën, pavarësisht luftës në Ukrainë.
Sanksionet lidhen me Roganin, i cili ka drejtuar kabinetin e Orban që nga viti 2015 dhe drejton shërbimet sekrete të Hungarisë, një anëtare e NATO-s. Departamenti Amerikan i Thesarit e akuzoi atë për përdorimin e pozicionit të tij për përfitime personale dhe politike.
“Njerëzit e afërt me partinë në pushtet kanë grumbulluar pasuri të madhe,” tha David Pressman, ambasadori i SHBA në Hungari. “Antal Rogan është një arkitekt, zbatues dhe përfitues kryesor i këtij sistemi korrupsioni.”
Zyra e kryeministrit Orban dënoi sanksionet, duke i quajtur ato “hakmarrja e fundit, e vogël e ambasadorit amerikan në largim”.
“Pas 20 janarit, Shtetet e Bashkuara të Amerikës do të kenë një qeveri të re dhe një president të ri. Pas inaugurimit të tyre, ne do të ndërmarrim hapat e nevojshëm ligjorë”, thuhet në deklaratën e kabinetit.
Orban dhe partia e tij Fidesz ishin ndër mbështetësit më të zëshëm të Trump në Evropë. Trump do të marrë presidencën më 20 janar.
Kjo nuk është hera e parë që SHBA vendos sanksione për korrupsionin në rajon – në vitin 2023, pesë zyrtarë bullgarë u sanksionuan me akuza të ngjashme. /Ballkani.info/







