ministri

Shala: Taksën ndaj Serbisë mund ta bëjmë 1000 për qind

Vendimi i Qeverisë së Kosovës për taksë 100 për qind ndaj produkteve të Serbisë dhe Bosnjës e Hercegovinës, si dhe bllokimi i rrugës Prishtinë – Shkup për qarkullimin e mjeteve dhe mallrave, ka bërë që eksportet nga Shqipëria drejt Kosovës për muajin nëntor të rriten më shumë se 40 për qind.

Por një deklaratë e radhës ka shpërthyer sot nga ministri i Tregtisë dhe Industrisë, Endrit Shala, duke thënë se taksa ndaj Serbisë do të rritet nga 100 për qind në 1000 për qind.

Shala tha se nuk kanë qenë kurrë më këmbëngulës për të vazhduar me këtë taksë derisa theksoi se taksa do të bëhej 1000 për qind nëse do të ishte nevoja.

Po ashtu ai ka thënë se Serbia dhe Bosnja duhet ta respektojnë Kosovën si shteti i pavarur dhe sovran nëse dëshirojnë që të bëjnë tregti në vendin tonë, njofton gazetametro.net.

“Serbia dhe Bosnja duhet ta trajtojnë Kosovën si Republikë nëse dëshirojnë të bëjnë tregti me Kosovën”, ka thënë Shala, i cili ka qenë i ftuar në emisionin “N’Kosovë Show”, transmeton Gazeta Metro.

Ndërkaq, sipas të dhënave të fundit që ka publikuar Drejtoria e Përgjithshme e Doganave të Shqipërisë, i bie se eksporti i mallrave nga Shqipëria drejt Kosovës është rritur në 33 mijë ton, që në vlerë monetare i bie rreth 7 milionë dollarë më shumë eksporte për muajin Nëntor të këtij viti duke e krahasuar me vitin e kaluar të 2017.

Kujtojmë se kryeministrja e Serbisë, Ana Brnbic, ka deklaruar ditë më parë se vendi i saj humb rreth 42 milionë euro në muaj për shkak të tarifave shtesë që Prishtina ka prezantuar për produktet serbe.