Sejdiu për koalicionin VV-LDK: Nuk jam ithtar i eksperimenteve, VV mund ta dëmtojë LDK-në
Ish-presidenti i Kosovës, Fatmir Sejdiu, ka komentuar edhe lidhjen e koalicionit të mundshëm për qeverisje mes LDK-së dhe Vetëvendosjes.
Sejdiu në RTV Dukagjini, duke folur për një marrëveshje koalicioni mes Vetëvendosjes dhe LDK-së ka thënë se mund të gjejnë një program të përbashkët por se ai personalisht “nuk është ithtarë i eksperimenteve”.
“Në këtë situatë të brishtë institucionale VV-LDK mund të gjejnë në program në formë kompromisi, por unë nuk jam ithtarë i eksperimenteve. Megjithatë ka çështje që mund t’i bashkojnë”.
Ai ka thënë se ajo që po pretendojnë në LDK për një mandat 4+4 me Vetëvendosjen nuk është aspak real dhe sipas tij ky koalicion vështirë se e çon deri në fund mandatin e parë.
Ish-presidenti ka thënë se LDK ka fajet e veta në disa tema të mëdha si ai demarkacionit apo Asociacionit të Komunave Serbe.
Sejdiu thotë se Vetëvendosje mund të mos jetë e gatshme për një marrëveshje finale.
Ai thotë se koalicioni me Vetëvendosjen mund ta dëmtojë LDK-në.
“LDK duhet të futet në qeveri me identitetin e vet. Është më rëndësi që të jetë partnerë i përgjegjshëm”, tha Sejdiu.
