Vitali Klitschko

“Rusët mund të na pushtojnë në çdo moment” – Klitschko përgatit planin e evakuimit të Kijevit

Presidenti i SHBA, Joe Biden dhe presidenti rus Vladimir Putin do të bisedojnë në telefon të shtunën pasi frika se Rusia mund të sulmojë Ukrainën po bëhet më konkrete.

Të premten, Shtetet e Bashkuara lëshuan një paralajmërim se një sulm i tillë mund të ndodhë brenda 10 ditëve të ardhshme dhe qeveritë perëndimore u bënë thirrje qytetarëve të tyre të largohen nga Ukraina.

Duke iu drejtuar gazetarëve pasi presidenti i SHBA-së mbajti një video-konferencë me disa liderë botërorë, Këshilltari i Sigurisë Kombëtare i SHBA-së, Jake Sullivan tha se shqetësimi i ri ishte se sulmi i shumëpritur mund të fillonte përpara përfundimit të Lojërave Olimpike Dimërore më 20 shkurt.

Deri më tani është spekuluar se një sulm i tillë mund të nisë pas Lojërave Dimërore, për të mos zemëruar Pekinin.

Kryetari i bashkisë së Kievit, Vitali Klitschko njoftoi hapat për të mbrojtur “objektet e infrastrukturës kritike dhe sociale” në rast të një emergjence të mundshme. Në një deklaratë të lëshuar në Telegram, Klitschko tha: “Përpjekjet tona kanë për qëllim parandalimin ose tejkalimin e provokimeve të mundshme dhe rezistencën ndaj sulmit ushtarak”.

Ai tha se përpjekjet përfshijnë krijimin e prodhimit shtesë të energjisë elektrike dhe krijimin e rezervave të karburantit për “deri në 10 ditë”, duke shtuar se më shumë se 500 objekte magazinimi dhe gati 4,500 “struktura me përdorim të dyfishtë” si shërbime të mbrojtjes civile janë të disponueshme në të gjithë qytetin.

Klitschko tha gjithashtu se plane evakuimi ishin vendosur në nivel qarku në të gjithë kryeqytetin.