vershimet ne SHBA

Rritet numri i viktimave të vërshimeve në ShBA

Së paku tetë persona kanë vdekur nga vërshimet në pjesën lindore të Shteteve të Bashkuara. Në mesin e viktimave raportohet se është edhe një fëmijë 2-vjeçar.

Policia në Nju Jork tha se përpos fëmijës, në mesin e viktimave është edhe një grua 48-vjeçare, e cila u gjet në shtëpinë e saj në Queens, pasi i kishte telefonuar autoritetet emergjente për ndihmë.

Dy viktima të tjera u gjetën në natën e së mërkurës në Rrugën 183. Një grua 45-vjeçare u dërgua në spital, ku u shpall e vdekur, ndërsa një 22-vjeçar u shpall i vdekur në vend, shkruan CNN.

Një burrë 50 vjeç, një grua 48 vjeçe dhe një djalosh 2 vjeç u shpallën të vdekur në vendin e ngjarjes në rezidencën e tyre në Rrugën 64, pasi policia, duke iu përgjigjur thirrjes për ndihmë, i gjeti ata pa vetëdije dhe pa shenja jete.

Në Brooklyn, policët gjetën një burrë 66 vjeç në shtëpinë e tij përderisa po i përgjigjeshin një thirrje për ndihmë. Ai u shpall i vdekur në vendin e ngjarjes.

Rajoni ka shënuar nivel të pashembullt të reshjeve. Qendra për parashikimin e stuhive ka paralajmëruar për nivelin e katërt të reshjeve, që është më i larti i mundshëm.