Në Qendrën Spitalore Universitare “Nënë Tereza” në Tiranë, mbrëmë ka ndodhur një aksident.

Ashensorit të spitalit, gjatë kohës kur po shfrytëzohej nga një pacient dhe punonjës shëndetësor, i është këputur një nga litarët, duke bërë kështu që ashensori të rrëzohet në katin e nëndheshëm -1.

Lëndime në kokë ka pësuar pacientja, një grua rreth të 80-tave, teksa lëndime trupore ka pasur edhe punonjësi shëndetësor.

Ndërkohë detaje mbi rastin ka dhënë edhe policia e Shqipërisë.

“Më datë 15.05.2022, rreth orës 23:30, në spitalin “Nënë Tereza”, në katin -1, barrelisti shtetasi K. D., duke transportuar me barrelë shtetasen V. C., paciente në spital, për shkak të një defekti janë bllokuar brenda në ashensor. Me ndërhyrjen e zjarrfikëses është bërë e mundur hapja e ashensorit. Shtetasi K. D. dhe pacientja, shtetasja V. C., janë dëmtuar dhe ndodhen në spital, nën kujdesin e mjekëve. Grupi hetimor po punon për zbardhjen e plotë të rrethanave të ngjarjes” thuhet në njoftimin policor.

Në një nga komisariatet policore të Tiranës është dërguar personi përgjegjës për mirëmbajtjen e ashensorëve në QSUT i cili është marrë në intervistë.