Eurovision 2022
Ronela Hajati flet e prekur për kritikat që mori në “Eurovision 2022”: Të gjithë ma kthyen shpinën
Këngëtarja Ronela Hajati ka përfaqësuar Shqipërinë në “Eurovision” gjatë vitit që lamë pas me këngën “Sekret”.
Ajo është kritikuar mjaft shumë për performancën dhe paraqitjen që kishte bërë në këtë kompeticion.
Artistja u pyet nëse do të merrte pjesë sërish në “Eurovision”, gjersa vazhdoi të tregonte në lidhje me eksperiencën që pati në 2022.
“Shiko, mua më ka qejfi. Vdes për skenën, për festivalet edhe gjithmonë kam dashur, pse të mos shkoj dy herë unë”, tha Ronela.
Hajati u shpreh tutje: “Nuk kam folur asnjëherë për Eurovisionin si eksperiencë në media, se e kam mbajtur për vete. Këtu, kur kam qenë andej kam parë se ka pasur një lum kritikash, vërejtjesh, si ka dalë. Gjatë gjithë 2022 edhe në fillim të 2023 kam kënduar në skenë ku as që e kisha imagjinuar”.
E njëjta u shpreh tejet e zhgënjyer pasi nuk pati përkrahje fare dhe se thuajse të gjitha i pagoi vetë.
“Këtu ma kthyen shpinën shumë njerëz, nuk e kisha prit se publiku mua më njeh, e di çfarë natyre në skenë. Çdo gjë që ka ndodhur atje, çdo gjest, ka qenë e mirëmenduar. Atje kam menduar vetëm të bëj shou për veten time”, shtoi ajo.
Ylli mes tjerash theksoi : ”Ai buxhet nuk mu dha kurrë, unë u detyrova edhe spotin, klipin përfaqësues e pagova vetë. Të shikoje shtetet e tjera se si flinin në çfarë hotelesh, ne kemi fjetur në një motel jashtë Torinos saqë kur vinin fansat, nuk dinin ku të na gjenin. Nuk mora kurrë një mesazh as nga drejtori, nuk kam pasur fare fare mbështetje. Është turp, jo për të ardhur keq. Kam paguar të gjithë hotelin, stafin se më lanë në mes të katër rrugëve”.
