Këngëtarja shqiptare me famë botërore, Rita Ora, ka qenë e ftuar së fundmi për të performuar në “Summertime ball 2019”.

“Summer time ball” është një festival i madh veror në Londër, i mbajtur çdo të shtunën e parë ose të dytë të qershorit nga stacioni “Radio Capital”. Organizohet çdo vit në stadiumin “Wembley”, me të ftuar emrat më të mirë të muzikës ndërkombëtare.

Prezente në këtë ngjarje ka qenë edhe artistja tjetër shqiptare që po bën emër në mediat e huaja, Ava Max.

Kjo e fundit ka pasur rastin që të takohet me patrioten e saj, Rita Orën, në prapaskenat e festivalit.

Ka qenë Rita fillimisht, ajo e cila ka publikuar një fotografi të dy vajzave në InstaStory, teksa të njëjtën Ava Max e ka rishpërndarë duke shkruar në mbishkrimin e saj: “E dua këtë vajzë”.

Rita përndryshe ka shprehur mbështetje për Ava Max që në fillimet e karrierës së saj.