Rexhep Hoti nënshkruan marrëveshje me kryetarin e Hanit të Elezit

Koordinatori Nacional për Kulturë, Rini dhe Sport në Qeverinë e Kosovës, Rexhep Hoti sot nënshkroi marrëveshje bashkëpunimi me Kryetarin e Hanit të Elezit, Rufki Suma për realizimin e Programit Nacional për Rininë.

Hoti tha se programi ka për qëllim avancimin e pozitës së të rinjve në sport, kreativitet kulturor dhe mendim kritik si dhe në dituri dhe se me këtë program qeveria kthehet drejtpërdrejt te nxënësit.

“Programi Nacional për Rininë është hartuar për të gjithë nxënësit e Republikës së Kosovës duke marrë parasysh rolin kyç që duhet të luajnë institucionet shtetërore për t’i ofruar të rinjve kushte të përshtatshme për mësim. Unë besoj se ky bashkëpunim do të jetë në interes të komunës, qeverisë si dhe gjithë vendit”, tha ai.

Ndërkaq, Suma tha se është i bindur se ky program do jetë mundësia më e mirë për të nxjerrë në pah talentët e Hanit të Elezit dhe të gjithë Kosovës.

“Ju përgëzoj për programin për të rinjt. Jam i bindur që ky program do të jetë i suksesshëm sepse ka garë dhe konkurrencë. Aty ku ka garë e konkurrencë ka sukses prandaj jam shumë i lumtur që ky program po implementohet nga Qeveria e Kosovës për nxënsësit tanë.

Në komunën tonë infrastruktura për sport është në nivelin e duhur por ne do të ju mbështesim më të gjitha mundësitë që kemi edhe në fushën e diturisë dhe kulturës”, theksoi Suma.

Marrëveshja e bashkëpunimit me Komunën e Hanit të përcakton angazhimet e ndërsjella të palëve nënshkruese për implementimin e Programit Nacional për Rininë dhe për organizimet e përbashkëta të aktiviteteve që kanë të bëjnë me diturinë, kreativitetin kulturor dhe mendimin kritik, si dhe sportin.