PDK nuk e mbështet rezolutën e propozuar nga Lëvizja Vetëvendosje për dekretim sa më të shpejtë të anëtarëve të Komisionit Qendror të Zgjedhjeve në Kosovë, ndërsa konsideron se seanca e sotme e Kuvendit është e panevojshme.

Kështu ka thënë sot deputeti i PDK-së Elmi Reçica, ku ka kërkuar që Kuvendi të mos ndërhyjë në kompetencat e presidentit.

Ai tha se si grup parlamentar janë dëmtuar më së shumti nga gjendja aktuale, pasi që kanë një deputet që pret në radhë për t’u emëruar.

Sipas tij, çdo vonesë e emërimit të anëtarëve të KQZ-së është e dëmshme dhe për këtë thekson se sa më parë duhet të bëhet zhbllokimi i këtij institucioni.