Vrasja në Pejë
Reagime pas vrasjes së gruas në Pejë, kërkohet dënim maksimal për dorasin
Një grua ka mbetur e vrarë sot në qytetin e Pejës, ku i dyshuari për vrasjen është bashkëshorti i viktimës.
Lidhur me vrasjen e sotshme në Pejë ka pasur reagime të shumta, ku u dënua ashpër vrasja e gruas.
Viktima ishte asistente e Stomatologjisë, ku ngushëllime kanë shprehur edhe Federata e Sindikatave të Shëndetësisë së Kosovës.
“Federata e Sindikatave të Shëndetësisë së Kosovës sot në mëngjes mori lajmin më të trishtë, për vrasjen mizore të anëtares së saj Asistentes së Stomatologjisë Gjyljeta Ukella nga Peja. Sot punëtorët shëndetësor janë në zi, i gjithë vendi është në zi, një jetë tjetër u shua, një grua tjetër mbeti viktimë”, thuhet në reagim.
Tutje, FSSHK kërkon nga autoritetet shtetërore që të zbardhet në detaj ky krimi dhe prejardhja e saj, njëjtë të veprohet edhe për rastet të tjera ku viktima është grua, kurse autorëve të këtyre krimeve tu shqiptohet dënimi maksimal.
Një reagim e ka bërë Rrjeti i Grave të Kosovës, të cilët thonë se e gjithë shoqëria duhet të bëhet zëri i grave dhe vajzave.
“Ende pa kaluar 5 ditë nga rasti tragjik i vrasjes së gruas në Ferizaj, sot na gjen tragjedia tjetër, ku për viktimë mbeti Gjyljeta Ukella, e vrarë nga bashkëshorti i saj, Edmond Lajçi. Deri më tani të gjitha këto vrasje kanë për motiv gjininë, po vriten gratë vetëm pse janë gra. Burrat po vazhdojnë të mendojnë se ata kanë të drejtë të vendosin për jetën e grave dhe vajzave që i rrethojnë”, vijon reagimi.
Tutje, thuhet se “në këtë pozitë ku janë vënë gratë dhe vajzat, reagimi ynë po duket pa ndonjë ndikim”.
“Sot gjithë shoqëria duhet të bëhet zëri i grave dhe i vajzave. Sot të gjithë duhet të ndihemi fajtor për tolerancën që e kemi ndaj dhunës e ndaj vrasjeve të grave. Vrasjet e grave duhet të trajtohen me urgjencë kombëtare. Sot shteti ynë duhet të fillojë menjëherë që me urgjencë ta trajtojë parandalimin e dhunës me bazë gjinore e të femicidit duke siguruar që të gjithë akterët relevant për trajtim të dhunës me bazë gjinore kanë në dispozicion të gjithë mekanizmat me qëllim të ofrimit të shërbimeve sa më të mira për viktimat, me viktimën në qendër, ashtu siç e kërkon edhe Konventa e Stambollit, pjesë e Kushtetutës së Kosovës”, theksohet në njoftim.
Gjyljeta Ukella u vra mëngjesin e sotëm derisa ishte në banesë. Lidhur me rastin, policia ka arrestuar bashkëshortin e saj dhe ka konfiskuar një armë zjarri.
VIDEO BONUS:
