Ramiz Kelmendi: Nuk shoh ndonjë politikan pos Thaçit që na sjellë informacione të besueshme nga SHBA

Ish-deputeti i Kuvendit të Kosovës, Ramiz Kelmendi, ka kërkuar largimin e taksës për të mos cenuar raportet me Amerikën.

Kelmendi, në “Debat Plus” me Ermal Pandurin në RTV Dukagjini ka thënë se vetëm Presidenti mund të sjellë ndonjë informacion nga Amerika për Kosovën.

“Unë momentalisht nuk shoh ndonjë politikan tjetër përveç Thaçit që mund të krijojë kontakte vizuale të drejtpërdrejta apo me letra me Amerikën e që në të kemi informata të besueshme në lidhje me dialogun”.

Ai thotë se në Samitin e Berlinit u panë shumë gjëra kur shumë liderë botërorë e injoruan Albin Kurtin dhe pothuajse askush nuk e uroi atë për zgjedhjen në postin e kryeministrit.

Duke folur për taksën, afaristi thotë se e ka mbështetur në atë kohë vendimin e qeverisë por se ajo nuk ka sjellë ndonjë benificion për Kosovën.

Ai thotë se momentalisht Shtetet e Bashkuara të Amerikës kanë qëndrim të njëjtë për taksën me Serbinë e jo me Kosovën.

“Ne nuk është dashur të lejojmë që SHBA të vijnë në një pozicion të njëjtë me shtetin serb [për taksën]”, tha ndër të tjera Ramiz Kelmendi.