Vaksinimi

Qytetarët vaksinohen me dozën e tretë, i bëjnë thirrje edhe të tjerëve që të marrin vaksinën

Procesi i vaksinimit kundër COVID-19 po vazhdon edhe sot në sallën “1 Tetori”, në Prishtinë, teksa nga e hëna ky proces do të bartet në Qendrën e Mjekësisë Familjare në lagjen Emshir.

Shumë nga qytetarët e pranishëm në sallën “1 Tetori”, po vaksinohen me dozën e tretë dhe po apelojnë tek të tjerët që të vaksinohen.

Skender Shylemaja kërkoi nga të gjithë ata që nuk janë vaksinuar të vaksinohen që mos të vijmë deri te infektimi masiv.

“Kam ardhur me marrë vaksinën e tretë. Sot gjashtë muaj e kam marrë të dytën, po ndihem mirë, problem nuk ka. Edhe kisha apeluar te të gjithë të tjerët të cilët se kanë marrë vaksinën të vijnë të vaksinohen se është në të mirë, se pari të shëndetin e tyre dhe është mirë për gjithë popullatën mos me ardh të infektimi masiv”, ka thënë ai.

Të njëjtin mendim ka edhe Nexhmije Ademaj që është vaksinuar me dozën e tretë.

“Vaksinën e tretë e kam marrë, shumë mirë kalova, mirë na presin. Apeloj të gjithë qytetarët që ta marrin, kur krejt bota e merr pse na mos me marrë”, ka thënë ajo.

E Sami Reizraka tregon që ka marrë vaksinat kundër Codvid-19 e edhe atë të gripit sezonal.

“Vaksinat i kam marrë të gjitha deri më tani, e kam marrë vaksinën kundër gripit, të gjitha këto që i kam marrë nuk kam pas kurrfarë problemi, as dhimbje. Prandaj apeloj të tjerët që të vijnë ta marrin këtë vaksinë sepse kjo është shumë e nevojshme, e dobishme për mua dhe për njerëzit tjerë dhe për mospërhapjen e Covid-19”, ka thënë ai.

Në 24 orët e fundit janë dhënë 1.978 doza të vaksinës kundër COVID-19.

Prej fillimit të vaksinimit në të gjitha qytetet e Kosovës janë dhënë 1.653.823 doza të vaksinës.

Ndërkaq, deri më sot 776.653 qytetarë janë vaksinuar me dozën e dytë /Telegrafi/