Vladimir Putin
Putin shpall 24 marsin ditë zie, thotë se autorët e masakrës janë kapur dhe do të dënohen gjithë përgjegjësit e aktit terrorist
Presidenti rus, Vladimir Putin, ka dalë në një adresim urgjent në Moskë, pas ngjarjeve të 22 marsit, ku katër persona të armatosur kanë hyrë në një qendër koncertesh dhe kanë vrarë të paktën 150 persona dhe plagosur qindra të tjerë.
Sipas Putin, në adresimin e tij për popullin, të gjithë keqbërësit janë kapur dhe të gjithë ata, të cilët janë përgjegjës për ngjarjet që tronditën Rusinë, do të ndëshkohen.
Ai po ashtu përmendi se 24 marsi, do të jetë një ditë zie kombëtare në Rusi, në nder të viktimave.
Megjithatë, Putin nuk u kursye me kaq, por akuzoi drejtpërdrejt edhe Ukrainën, e cila sipas tij kishte përgatitur në kufi një “dritare”, nga e cila terroristët do të mund të dilnin prej territorit rus.
Më tej, ai shtoi se “gjithë armiqtë e Rusisë nuk do të jenë të gjendje ta ndajnë shtetin”, teksa nuk komentoi mbi marrjen e autorësisë nga ana e Shtetit Islamik.
Çfarë ka ndodhur në 24 orë?
Janë arrestuar në Moskë 11 persona, mes të cilëve janë edhe katër të dyshuar si autorët e një sulmi terrorist të ndodhur mbrëmjen e 22 marsit në një sallë koncertesh, ku të vdekur mbetën 150 persona dhe qindra të tjerë u plagosën.
Sipas shërbimit inteligjent rus FSB, katër autorët e një sulmi makabër në një sallë koncertesh në Moskë, kishin lidhje me Ukrainën dhe po përpiqeshin të shkonin drejt kufirit pas ngjarjes.
Po ashtu, nga mediat ruse është publikuar edhe një fotografi e njërit prej autorëve të dyshuar, si edhe mjetit me të cilin ata kanë udhëtuar për ta kryer aktin – një Renault e vjetër e bardhë.
Akti terrorist i mbrëmjes së 22 marsit në Crocus City Hall është marrë përsipër zyrtarisht nga ISIS, grupimi i militantëve islamistë, i cili jo pak herë ka kërcënuar dhe faktuar se është i aftë për ngjarje të tilla.
Janë katër ose pesë persona të përfshirë, të gjithë të trajnuar ushtarakisht nga sa kuptohet, me pajisje moderne armatimesh dhe me qëllim të vetëm vrasjen e kujtdo në rrezen e tyre.
Paralajmërimi amerikan kishte ardhur që prej 7 marsit ndaj rusëve: Kini kujdes, një sulm terrorist po përgatitet nga ISIS-i. Thirrjet e tyre ishin injoruar krejtësisht, madje edhe përçmuar nga presidenti i sapo-rizgjedhur rus, Vladimir Putin.
Videot bënë xhiron e botës, jo pak herë të pacensuara.
Fëmijë, gra, vajza e djem të rinj të pakursyer nga sulmi terrorist. Akti mbeti i dënuar ndërkombëtarisht, por deri tani kaq.
Paramilitarët janë arritur të filmohen vetëm nga larg përmes videove, kanë mbyllur qendrën ku ndodheshin mbi 6 mijë persona njëkohësisht aty dhe kanë nisur breshërinë.
Forcat speciale ruse, ose shërbimet e inteligjencës, nuk kanë gjetur deri tani asgjë.
Më herët, Rusia hodhi edhe dyshime se ky mund të ishte një sulm ukrainas, por gjithçka u hodh menjëherë poshtë nga Mikhailo Podolyak, këshilltari kryesor i presidentit ukrainas, Volodymyr Zelensky.
Podolyak shkruan në reagim:
Para së gjithash, Ukraina ka luftuar me Ushtrinë ruse për më shumë se dy vjet. Dhe gjithçka në këtë luftë do të vendoset vetëm në fushën e betejës. Vetëm nga sasia e armëve dhe vendimet cilësore ushtarake. Sulmet terroriste nuk zgjidhin asnjë problem…
Së dyti, Ukraina nuk është përfshirë kurrë në përdorimin e metodave terroriste. Është gjithmonë e pakuptimtë. Ndryshe, meqë ra fjala, vetë Rusia, e cila përdor sulme terroriste në luftën aktuale kundër Ukrainës dhe më herët në historinë e saj sulmoi qytetarët e saj për të iniciuar “veprime kundër-terroriste” të mëvonshme kundër grupeve etnike protestuese. Mjafton të kujtojmë ngjarjet në autostradën Kashirskoye (Moskë) dhe në Volgodonsk…
Dhe së treti, shumë kohë përpara ngjarjeve në Crocus City Hall, kishim dëgjuar paralajmërime publike nga ambasadat e huaja të vendosura në Moskë për mundësinë e ekseseve të tilla të përgjakshme.
Si përfundim: nuk ka asnjë dyshim më të vogël se ngjarjet në periferi të Moskës do të kontribuojnë në një rritje të mprehtë të propagandës ushtarake, militarizimin e përshpejtuar, mobilizimin e zgjeruar dhe, në fund të fundit, shkallëzimin e luftës. Dhe gjithashtu për të justifikuar sulmet e dukshme gjenocidale kundër popullsisë civile të Ukrainës…
Aspekti më i çuditshëm i gjithë ndërkaq, mbetet fakti se Ambasada Amerikane në Moskë kishte lajmëruar një rrezik të mundshëm të një sulmi terrorist dy javë më parë. Por, e gjitha ishte anashkaluar nga presidenti rus, Vladimir Putin.
VIDEO BONUS:
