PSG do ta lejojë largimin e Neymarit, Mbappe konfirmohet lider

Neymar dhe PSG janë “të dënuar” ta kuptojnë njëri-tjetrin deri në fund të sezonit. Pasi të mbyllet kampionati atëherë palët do të studiojnë përsëri mundësinë e një “divorci”, që nuk u konsumua këtë verë, sepse oferta që mbërriti nga Barcelona u konsiderua më pak se e pamjaftueshme.

Por pozicionet mbeten të njëjta: lojtari do të kërkojë me ngulm largimin verën e ardhshme dhe klubi, do të dëgjojë ofertat që mbërrijnë. Emiri i Katarit, Al Khelaifi, kërkoi 300 milionë euro për të lejuar largimin e tij, një shifër shumë me e lartë se ajo që mund të ofrojë Barcelona apo skuadrat e tjera të interesuara për brazilianin.

Sidoqoftë, klubi që dëshiron yllin e “Seleçaos” mund të përgatisë rreth 180 milionë euro nëse dëshiron të marrë 27-vjeçarin dhe të gjitha indiciet të drejtojnë te Barcelona. PSG mban një qëndrim me Neymarin shumë të ndryshëm nga Mbappe. Nuk ka ndërmend të lejojë largimin e të dyve dhe hapat që janë ndërmarrë deri më tani të bëjnë të kuptosh se lamtumira i përket brazilianit.

Kylian Mbappe është lojtari më i lakmuar në Evropë. Të gjitha të mëdhatë, përfshirë Real Madridin, janë në pritje të lëvizjes së yllit të ri të futbollit, me një kontratë në fuqi deri në vitin 2022, por pa i dhënë shenja klubit parisien se ai do të rinovojë atë.

Sigurisht që gjatë muajve të ardhshëm PSG do ta ketë gjetur formulën për ta bindur kampionin e botës që të hedhë të zezën mbi të bardhë për zgjatjen e bashkëpunimit.