Pse nëna po dyshon se djalin 11-vjeçar ia vranë në Fushë-Kosovë?
Një 11-vjeçar është gjetur i vdekur në njërën nga lagjet në Fushë Kosovë. Por, sipas nënës së djalit, vdekja nuk i erdhi natyrshëm. Ajo thotë se djalin e saj e kanë vrarë. Madje sipas saj, djali i saj ishte dhunuar edhe seksualisht nga po i njëjti person. Dyshime për këtë rast kanë edhe komshinjtë e të miturit, ndërsa po të njëjtin person është duke e kërkuar edhe Policia e Kosovës, raporton T7
Edhe të mërkurën, doli bashkë me nënën e tij si çdo ditë tjetër.
I mituri, K. Veseli, mblidhte kanoçe për të siguruar ekzistencën.
Por, meqenëse kishte filluar të binte shi i madh, nëna e tij u largua, por 11-vjeçari vendosi të qëndrojë edhe pak me një qëllim.
Ndonëse Makfire Ilazi, nëna e të miturit, i kishte bërë thirrje të mos vonohet, vogëlushi s’pati mundësi t’iu përgjigjet thirrjeve të saj, pasi që nuk u kthye më i gjallë në shtëpi.
I njëjti u gjet vetëm gjatë së enjtes, i vdekur në rrugën “Xhemajl Mustafa” në Fushë Kosovë.
Por, vdekja e tij duket të mos jetë natyrale.
Madje familja e 11 vjeçarit kanë dyshime se atë dikush mund ta ketë vrarë.
Sipas nënës se viktimës, djali i saj gjithmonë kishte pasur frikë nga një djalë tjetër me incialet S.O e që është më i madh në moshë.
Madje Makfire Ilazi thotë se i biri i saj i kishte thënë se ai e dhunonte edhe seksualisht.
Ndërkohë që ekipi i T7 po qëndronte në lagjen ku banonte viktima, aty u paraqit edhe Policia e Kosovës.
Ata po kërkonin djalin që sipas banorëve, dyshohet të ketë lidhje me rastin.
Ndërsa një nga komshinjtë e tij, tha se familja e të dyshuarit e kanë braktisur një natë më parë lagjen, ndërsa S.O nuk ishte paraqitur në shtëpi qe dy ditë.
Ndërkohë, banorët e lagjes tregojnë se si e kishin gjetur të vdekur viktimën.
Hasim Pucolli thotë se menjëherë e kishte lajmëruar policinë. Pucolli thotë se tek viktima, kishte vërejtur shenja dhune.
Policia e Kosovës nuk ka dhënë më shumë detaje duke thënë se hetimet vazhdojnë ndërsa nga Prokuroria është thënë se viktima u gjet me shenja dhune. Gjatë ditës viktimës i është bërë edhe autopsia.
https://www.youtube.com/watch?v=rJ150w2iXX8
