Petkoviq

Provokon Petkoviç: Serbia do t’i vaksinojë të gjithë qytetarët e Kosovës

Drejtori i të ashtuquajturës zyrë serbe për Kosovën në Qeverinë e Serbisë, Petar Petkoviq tha se reagimet që janë bërë në Kosovë pas fillimit të vaksinimit në veri të vendit janë vetëm sulme që po bëhen gjatë fushatës elektorale.

“Ne jemi mësuar që Serbia të jetë shënjestra kryesore e sulmeve gjatë çdo fushate elektorale në Prishtinë, por ambiciet politike të askujt nuk duhet të jenë mbi shëndetin dhe jetën e njerëzve,” tha drejtori i të ashtuquajturës Zyrë për Kosovë në Qeverinë e Serbisë.

Petkoviq ka përmendur edhe 1 mijë testet që janë dërguar në Kosovë në fillim të pandemisë.

“Koronavirusi nuk e njeh origjinën etnike të dikujt, gjë që kuptohet mirë nga Serbia, e cila, me rekomandimin e Presidentit Aleksandar Vučić, po përpiqet të sigurojë vaksina të mjaftueshme për komunitetet e tjera në Kosovë, pasi ne i dhuruam 1.000 teste PCR Institutit të Shëndetit Publik në Prishtinë. Kemi detyrim që të sigurojmë sasi të mjaftueshme të vaksinave për të gjithë qytetarët, pa përjashtim,” tha Petkoviq tutje.

Ai thotë se është e pakonceptueshme që dikush ta vendosë politikën mbi ruajtjen e jetës dhe që në një kohë kur e gjithë bota po lufton me një pandemi si koronavirusi.

“Serbia dhe presidenti i saj, Aleksandar Vuçiq, gjithmonë do ta vendosin të mirën publike mbi politikën ditore. Serbia është krenare që ne ishim të parët në rajon dhe i dyti në Evropën kontinentale që filluam imunizimin, sepse koha është faktori vendimtar në këtë murtajë,” citohet të ketë thënë Petkoviq.

Ky reagim vjen një ditë pasi Qeveria në krye me Avdullah Hotin paralajmëroi hetime për nisjen e vaksinimit në veri.