Policia kap tre persona të dyshuar për vrasje në tentativë në Prishtinë, të gjithë nën 22 vjeç

Policia e Kosovës ka arrestuar tre persona si të dyshuar për rastin vrasje në tentativë që kishte ndodhur në tetor të vitit të kaluar në Prishtinë.

Kështu ka bërë të ditur zëdhënësi i Policisë së Kosovës për Rajonin e Prishtinës, Agron Borovci.

“Sot në orët e pasdites janë arrestuar tre të dyshuar të cilët ishin shpallur në kërkim për rastin vrasje e mbetur në tentativë të ndodhur më datë 24.10.2020 në rrugën “Isa Boletini” në Prishtinë. Në këtë ngjarje lëndime të rënda trupore, nga mjete të mprehta kishin marrë dy viktima të cilët ishin trajtuar në QKUK. Të tre të dyshuarit;  B. GJ, mashkull 22 vjeç, shtetas i Republikës së Kosovës,  A. GJ, mashkull 20 vjeç, shtetas i Republikës së Kosovës, si dhe  E. T, mashkull 20 vjeç, shtetas i Republikës së Kosovës, me urdhër të prokurorit të shtetit janë ndaluar në qendrën e mbajtjes prej 48 orësh për procedim të mëtejmë nën dyshimin për veprën vrasje në tentativë”, ka thënë Borovci.