Policia e Kosovës ka konfirmuar aksidentin që ndodhi sonte në rrugën Prishtinë-Pejë, në Komoran.
Sipas zëdhënësit të Policisë, Daut Hoxhës, aksidenti ka ndodhur pak pas orës 19:00.
Në këtë aksident sipas zëdhënësit janë përfshirë tri automjete.
“Deri tani sipas informacioneve nga terreni 6 persona kanë marrë lëndime dhe janë dërguar për trajtim mjekësor”, tha Daut Hoxha për KALLXO.com.
Njësitet policore dhe ato kompetente për menaxhim të trafikut në autostradë po ndërmarrin veprimet e nevojshme për hetimin e shkaqeve të këtij aksidenti dhe po kryejnë procedurat e nevojshme në vendin e aksidentit, shtoi zëdhënësi i Policisë.
Zëdhënësi i Policisë ka shfrytëzuar rastin të kërkojë nga të gjithë pjesëmarrësit në trafik, në veçanti drejtuesit e automjeteve, që të jenë të kujdesshëm dhe të respektojnë rregullat e trafikut, në veçanti ato mbi përcaktimin e shpejtësisë dhe vozitjen t’ua përshtatin kushteve të rrugës.
“Policia me njësitet e saj po ndërmerr dhe do të ndërmarrë masa te nevojshme ligjore për të gjithë ata drejtues që bien ndesh me rregullat në komunikacion, duke përfshirë edhe mosposedimin e pajisjeve dimërore”, tha ai.







