Në Ankara, dje, është botuar libri “Përmbledhje poezish”, në të cilin janë të përmbledhura poezitë më të mira të autorit të njohur në letërsinë turke, Abdurrahim Karakoç.

Për botimin e librit ka njoftuar përkthyesja e librit, Fatijona Bajraj, e cila në rrjetin social në Facebook, ka thënë: “Sot, në Ankara të Turqisë doli nga shtypi libri “Mihriban”, përmbledhje poezish të autorit të njohur turk, Abdurrahim Karakoç, libër të cilin e kam përkthyer nga gjuha origjinale, ajo turke. Boton shtëpia botuese “Kadim Kitap”.”

Ky është libri i pestë i përkthyer nga Fatijona Bajraj, e cila në planet e saja ka përkthimin e autorëve të mëdhenj të letërsisë turke dhe asaj orientale, të cilët mungojnë në gjuhën shqipe.

Në lidhje me librin dhe poezitë e Karakoçit, recensenti i librit, Albin Mehmeti, ndër të tjera thotë:

“Dashuria dhe malli është binomi i pashmangshëm në pothuajse të gjitha poezitë. Malli për të kaluarën bën që poeti të mos arrijë të jetojë në të tashmen, por të jetojë me njërën këmbë në të djeshmen e lumtur dhe me njërën këmbë në të nesërmen utopike, në të cilën ka shpresë se do ta gjejë ilaçin për mallin. I vetmi ilaç, i cili do ta shërojë nga dhimbja e të djeshmes është harresa që mund të vijë nesër. Kjo, sipas poetit është e pashmangshme, pasi që preokupimet e jetës janë më të fuqishme sesa malli. Për Karakoçin, dashuria para se të jetë ndjenjë është dhimbje, është hanxhari, i cili godet mu në zemër. Dashuria e Karakoçit është pritje për të dashurën, pritje e cila e vret. Për mallin, dhimbjen e plagët e dashurisë qajnë konkretja e abstraktja, shiu e era, tërmeti e malet. Karakoçi përmes figuracionit letrar e bën që për dashurinë të flasë memeci e të heshtë oratori.”

Libri u botua nga shtëpia botuese “Kadim Kitap” në Ankara, kurse u përkthye nga Fatijona Bajraj.

Redaktor i librit është Albin Mehmeti, kurse për lektorimin u përkujdes Kosovare Ramadani.