PDK propozon pika shtesë për Rezolutën për Dialogun
Shefi i Grupit Parlamentar, Memli Krasniqi në seancën e jashtëzakonshme për çështjen e ‘Korrigjimit të kufijve’ ka thënë se PDK u ka bërë thirrje partive opozitare për konsensus në dialogun me Serbinë por që e kanë refuzuar.
Sipas tij, diskutimi për ndarjen e Kosovës është gjë e rrezikshme dhe se i bënë dëm Kosovës në dialogun me Serbinë.
“Partitë opozitare kanë hezituar të bëjnë konsensusin. Ne tërë vitin i kemi ftuar, mirëpo ata kanë refuzuar. E kemi prezantuar platformën e Kadri Veseli deputetëve nuk e kanë pranuar. Kanë pas vijat e kuqe për dialog. Ne si parti jemi për dialogun, por që në asnjë mënyrë nuk lejojmë që të cenohet sovraniteti dhe integriteti territorial i Kosovës. Ngritja e temës për ndarjen e Kosovës janë vec spekulime të cilat mund ta dëmtojnë Kosovën në procesin e dialogut përballë Serbisë. Pastaj, është rreziku i krijimit të asocicacionit me kompetenca ekzekutive”, ka thënë Krasniqi, raporton Indeksonline.
Deputeti Krasniqi para foltores së Kuvendit ka propozuar disa pika shtesë.
1. Kuvendi i Republikës së Kosovës i jep mbështetje vazhdimit të Dialogut për Normalizimin e Marrëdhënieve ndërmjet Kosovës dhe Serbisë, si mënyra më e mirë për arritjen e një marrëveshjeje ndërkombëtare obligative ndërmjet të dy shteteve, që do të rezultonte me njohjen e ndërsjellë shtetërore të të dy palëve dhe me anëtarësimin e Republikës së Kosovës në OKB, si dhe me përshpejtimin e integrimit të Republikës së Kosovë në Bashkimin Evropian dhe në NATO.
2. Kuvendi i Republikës së Kosovës do të angazhohet për arritjen e konsensusit të brendshëm politik për Dialogun Kosovë – Serbi, duke përfshirë Platformën e përbashkët për Dialogun, që do të përmbajë parimet themeltare dhe pozicionet shtetërore të Republikës së Kosovës për të gjitha çështjet që ndërlidhen me këtë proces.
3. Kuvendi i Republikës së Kosovës themelon një Komision të veçantë, me përgjegjësi për ta monitoruar nga afër procesin e Dialogut dhe punën e delegacionit të Republikës së Kosovës. Ky Komision do të përbëhet nga Kryetarët e Grupeve Parlamentare dhe do të udhëhiqet nga një përfaqësues i opozitës.
4. Delegacioni i emëruar nga Qeveria e Republikës së Kosovës, i plotësuar edhe me përfaqësues të partive opozitare, që do të përfaqësojë Republikën e Kosovës në Dialog, do t’i raportojë rregullisht Komisionit të veçantë për monitorimin e Dialogut mbi ecurinë e këtij procesi dhe zhvillimet e tij.
5. Kuvendi i Republikës së Kosovës ka rol qendror dhe vendimtar në Dialogun Kosovë – Serbi. Marrëveshja eventuale që mund të arrihet nga faza përfundimtare e Dialogut Kosovë – Serbi mund të jetë e vlefshme vetëm pas ratifikimit në Kuvendin e Republikës së Kosovës, me votat e dy të tretave të të gjithë deputetëve ose nëse merr mbështetjen e shumicës së qytetarëve përmes referendumit.
6. Kuvendi i Republikës së Kosovës rithekson se Kushtetuta e Republikës së Kosovës, sovraniteti shtetëror, integriteti territorial dhe karakteri shtetëror unitar i Republikës së Kosovës janë të pacenueshme dhe vetëm Kuvendi i Republikës së Kosovës ka autoritet dhe kompetencë për të vendosur për këto çështje.
