Pas djegies së Kuranit, në Suedi lejohet edhe një tubim ku do të digjen Bibla dhe Tora
Policia suedeze tha të premten se kishte dhënë një leje për një protestë që do të përfshinte djegien e teksteve të shenjta jashtë ambasadës izraelite në Stokholm, duke shkaktuar dënime nga Izraeli dhe organizatat hebraike.
Protesta e diskutueshme, e planifikuar për të shtunën, vjen disa javë pasi një burrë i vuri zjarrin faqeve të Kuranit jashtë xhamisë kryesore të Stokholmit – duke çuar në zemërim dhe dënime të përhapura në mbarë botën.
Tubimi, siç thuhet më tej, do të përfshinte djegien e Torës dhe Biblës.
Në një koment për AFP, policia e Stokholmit theksoi se në përputhje me legjislacionin suedez u dha leje njerëzve për të mbajtur tubime publike dhe jo për aktivitetet e kryera gjatë tyre.
“Policia nuk jep leje për të djegur tekste të ndryshme fetare – policia lëshon leje për të mbajtur një tubim publik dhe për të shprehur një mendim”, ka thënë Carina Skagerlind, oficere e shtypit për policinë e Stokholmit.
“Një dallim i rëndësishëm”, shtoi ajo.
Presidenti i Izraelit, Isaac Herzog ishte një nga disa përfaqësues izraelitë dhe organizata hebraike që dënoi menjëherë vendimin.
“Unë dënoj pa mëdyshje lejen e dhënë në Suedi për djegien e librave të shenjtë”, tha Herzog në një deklaratë.
Lexo po ashtuSiç edhe ishte paralajmëruar, një burrë irakian djeg Kuranin jashtë një xhamie në Stokholm
“E dënova djegien e Kuranit, të shenjtë për myslimanët në mbarë botën, dhe tani jam i lënduar që i njëjti fat e pret një Bibël hebraike, librin e përjetshëm të popullit hebre”, shtoi kreu i shtetit.
Ndërsa Yaakov Hagoel, kryetar i Organizatës Botërore Sioniste, tha në një deklaratë se dhënia e lejes “nuk ishte liri e shprehjes, por antisemitizëm”.
