Spitali i Mitrovicës
Pagesa për shërbime në spital, baneri që krijoi huti tek qytetarët
Baneri i vendosur shkaktoi goxha huti për mitrovicasit.
Pasi pagesa prej 10 euro për t’u trajtuar në Spitalin e Mitrovicës, në rast se shkojnë pa udhëzim të mjekut, për ta ishte e paarsyeshme.
“A është në rregull? – Nuk është në rregull. Nëse proklamohet se shëndetësia është pa pagesë, dhe kjo në raste emregjente, njerëzit nuk shkojnë për qef, munden mos me i qëllu edhe te holla. Nuk po e shoh të arsyeshme. Faktikisht nuk ka logjikë”, thotë qytetari Nexhat Berani.
“Me i bo me pare është shumë keq, se populli nuk ka. S’ka pare, S’ka me çka të jetojë, vetëm kush e ka dikë jashtë. Por, krejt nuk i kanë jashtë familjarët, që domethënë nuk munden me i pas krejt punët mirë, kur shumica nuk punojnë”, shprehet qytetari, Skender Beqiri.
Ekipi i televizionit nuk u lejua të xhirojë brenda hapësirave të Spitalit ky ishte vendosur një baner ku specifikonte pagesën.
Por, U.D drejtori mjekësor i Spitalit Gëzim Berisha tha që ky baner është larguar gjatë ditës së hënë.
“Baneri ka qenë i vjetër, që s’ka nevojë me ekzistua, se ne punojmë në bazë të udhëzimit administrativ. Po sidoqoftë, edhe pse ka ekzistua ky baner, nuk është vepruar sikurse thoshte baneri, pasi të gjithë kanë marrë shërbime” sqaron Berisha.
Sipas tij, Spitali funksion me udhëzimet në fuqi sa i përket pagesës financiare të pacientëve.
“Lidhur me bashkëpagesat,ne funksionojmë në bazë të udhëzimit administrativ, 04/2007, i cili thotë tekstualisht se nëse pacientet vijnë me kërkua ndihmë mjekësore në nivel sekondar, siç është spitali jonë, duhet të kenë udhëzim nga QKMF apo QMF, në të kundërtën duhet të bëjnë participim prej 10 euro”, thotë Berisha.
Për këtë çështje, Spitali i Mitrovicës ka reaguar edhe në facebook, ku kanë dhënë statistika për pacientët e muajit prill që kanë marrë trajtim në Spital, e që asnjëri prej tyre nuk ka kryer asnjë pagesë.
