Vizitë

Osmani udhëton për në Çeki, merr pjesë në samitin e parë të Komunitetit Politik Evropian

Presidentja e Kosovës Vjosa Osmani, ka udhëtuar për në Pragë ku do të marrë pjesë në samitin e parë të Komunitetit Politik Evropian.

Ajo do të marrë pjesë me ftesë të kryeministrit të Çekisë, Petr Fiala.

“Ky takim inaugurues do të mbledhë krerë shtetesh nga 44 vende të kontinentit evropian me qëllim të nxitjes së dialogut politik dhe forcimit të bashkëpunimit për t’i adresuar çështjet më urgjente të sigurisë dhe stabilitetit në Evropë” – njofton Presidenca e Kosovës përcjell Klankosova.tv

Osmani krahas pjesëmarrjes do të zhvillojë takime edhe me liderë evropianë, ku do të përçojë mesazhin e palëkundur të popullit dhe institucioneve të Kosovës, për integrim euroatlantik.

“Krahas pjesëmarrjes në sesionet kryesore të Komunitetit Politik Evropian, Presidentja Osmani do të zhvillojë takime bilaterale me liderë evropianë për të diskutuar thellimin e bashkëpunimit për tejkalimin e sfidave të përbashkëta. Para liderëve evropianë, Presidentja Osmani do ta përçojë mesazhin e përkushtimit të palëkundur të popullit dhe institucioneve të Republikës së Kosovës për integrimin euroatlantik të Kosovës si garanci për paqe të qëndrueshme në rajon dhe më gjerë. Gjatë takimeve bilaterale, Presidentja Osmani do të diskutojë edhe mbështetjen për anëtarësimin e Kosovës në organizata ndërkombëtare”.

Komuniteti Politik Evropian është platformë për koordinim politik e krijuar mbi bazën e propozimit të presidenti francez, Emmanuel Macron dhe në të cilën do të bashkohen liderët e 27 vendeve anëtare të Bashkimit Evropian (BE) dhe liderët e 17 vendeve të tjera evropiane.

Kjo nismë synon nxitjen e dialogut dhe bashkëpunimit për çështje me interes të përbashkët, forcimin e sigurisë, stabilitetit dhe prosperitetit në kontinentin evropian.