Osmani për fillimin e gjysmëvjetorit: Arsimi duhet të jetë prioritet mbi prioritete

Ushtruesja e detyrës së Presidentit të Kosovës, Vjosa Osmani, ka uruar nxënësit, prindërit dhe mësimdhënësit për fillimin e gjysmëvjetorit të dytë shkollor.

Përmes një postimi në Facebook, ajo tha se investimi në arsim duhet të jetë prioritet mbi prioritetet, sepse, sipas saj, vetëm në këtë mënyrë do të mund ta krijojmë një ekonomi të qëndrueshme, një shoqëri stabile dhe një shtet të fortë. /Ballkani.info/

Postimi i plotë:

Të dashur nxënës, prindër e mësimdhënës,

Sot keni nisur gjysmëvjetorin e dytë, megjithëse në rrethana më specifike, shkaku i pandemisë Covid-19. Një ditë domethënëse, një rifillim për të zënë dije.

Përpara keni një periudhë me plot angazhime e sfida. Investimi në arsim duhet të jetë proritet mbi prioritetet, sepse vetëm në këtë mënyrë do të mund ta krijojmë një ekonomi të qëndrueshme, një shoqëri stabile dhe një shtet të fortë.

Në rrugën e dijes ju do të vendosni themelet e të ardhmes. Do të aftësoheni të merrni vendime për veten e më pas edhe për të tjerët.

Në këtë gjysmëvjetor uroj që secili nga ju të ndihet krenar për arritjet.

Duke ju inkurajuar për sa më shumë përkushtim në çdo ditë të mësimit, uroj për një fillim të mbarë dhe një përmbyllje me sukses!