Në fillim të kësaj jave, shoqata “Çamëria” në Kosovë ka bërë të ditur se do të organizojë “Marsh për Bashkim”. Ky marsh që ka të bëjë me kërkesën e Luginës së Preshevës për bashkim me Kosovën, do të mbahet më 10 nëntor (e shtunë) në Prishtinë.
Në një prononcim për Ballkani.info kryetari i shoqatës “Çamëria” në Kosovë, Nexhmi Muçiqi, ka treguar për detajet e organizimit të “Marshit për Bashkim”. Ai ka konfirmuar pjesëmarrjen e liderëve të Luginës së Preshevës në marsh, por edhe të shumë qytetarëve të asaj pjese.
“Mund të them që organizimi është duke shkuar shumë mirë. Liderët e Luginës së Preshevës, iu kanë përgjigjur pozitivisht këtij organizimi, dhe e kanë konfirmuar pjesëmarrjen. Deri në këto momente që po flasim janë të konfirmuar 100 autobusë, dhe duke i llogaritur marrëveshje-momerandumet me shumë shoqata të shoqërisë civile, pritet që në marsh të jenë mbi 10 mijë qytetarë”, ka thënë Muçiqi.
“Marshi për Bashkim” do të niset në ora 11:00 nga Biblioteka Kombëtare në Prishtinë, për të vazhduar më pas drejt shesheve të kryeqytetit dhe në fund marshuesit do të ndalën në sheshin “Skënderbeu”.
Marshuesit pritet që në orën 12:00 të arrijnë para institucioneve qendrore të vendit, Qeverisë, Presidencës dhe Kuvendit.
Kujtojmë se ky marsh organizohet në përkrahje të idesë së Presidentit Hashim Thaçi për korrigjim të kufijve, e që nënkupton bashkimin e Luginës së Preshevës me Kosovës. /Ballkani.info/







