Nuk ndalet greva, BSPK del me një njoftim të ri
BSPK ka njoftuar se greva e filluar javën e kaluar është duke u zhvilluar pa probleme dhe sipas rregullave dhe normave ligjore.
Në një komunikatë dërguar medieve, thuhet se BSPK është e shqetësuar nga mosreflektimi i Qeverisë përkitazi me kërkesat sindikale.
Komunikata e plotë e BSPK-së:
Sot, e hënë, më 29 gusht 2022, duam të informojmë opinionin se greva e përgjithshme në nivel vendi është duke u zhvilluar mirë dhe pa probleme e plotësisht sipas rregullave dhe normave ligjore.
Por, ajo që e shqetëson BSPK-në është mosreflektimi i Partnerit tonë Social – Qeverisë përkitazi me kërkesat e arsyeshme sindikale.
Partneri ynë Social – Qeveria duhet që të punësuarve të saj t’ua dëgjojë hallet dhe të merret seriozisht me shqetësimet e tyre.
Partneri ynë Social – Qeveria duhet t’i jepet arsyes dhe të na thërrasë në tavolinën e bisedimeve e kjo do duhej të bëhet sa më parë për të mirën e të gjithëve.
BSPK është në pritje të hapjes së dialogut të mirëfilltë social midis Partnerëve Socialë ashtu si e do rregulli dhe si e thotë ligji.
