Një veturë “made in Albania”, rivale e Lamborghinit dhe Ferrarit FOTOT

Shqipëria mund të bëhet shumë shpejt me markë të saj të veturës dhe jo vetëm kaq, pritet të jetë super-veturë.

Qëndrim Thaqi, themelues i Arrera Automobili, është gati për të realizuar projektin e tij madhor: superveturën Illyrian Pure Sport.

Për momentin, bëhet fjalë vetëm për një ide, por nëse do të përfundojë projekti, Illyrian Pure Sport do të jetë vetura e parë me standarde ndërkombëtare që do të prodhohet në Shqipëri.

Nga fotot e postuara, vetura ngjan me Porsche 9RE, por me disa pjesë të frymëzuara nga markat e famshme italiane. Sidomos pjesa e përparme duket si një Lamborghini Gallardo.

Mendohet se kjo veturë do të ketë një shpejtësi maksimale prej 375 km/h dhe do të arrijë nga 0 në 100 km/h për vetëm 2,7 sekonda. Të dhëna të tilla do ta bënin një rivale të fortë të Lamborghini Aventador apo Ferrari 812 Superfast.