Pedro Sanchez

Nga shtatori, udhëtimet me tren në Spanjë do të jenë falas

Çmimet e transportit publik në të gjithë Spanjën tashmë janë përgjysmuar që prej rritjes së çmimeve të energjisë dhe karburantit. Nga shtatori udhëtimet lokale me tren dhe ato të distancave mesatare, do të jenë falas.

Kryeministri i Spanjës, Pedro Sanchez, ka njoftuar se “treni pa pagesë” do të zgjasë deri në fund të këtij viti.

“Kjo masë inkurajon në maksimum përdorimin e këtij lloji të transportit publik kolektiv për të garantuar udhëtimin e nevojshëm ditor me një mjet transporti të sigurt, të besueshëm, komod, ekonomik dhe të qëndrueshëm, në kushtet e jashtëzakonshme të rritjes së vazhdueshme të çmimeve të energjisë dhe karburanteve”, thuhet në një deklaratë të Ministrisë Spanjolle të Transportit.

Spanja nuk është i vetmi vend evropian që ka marrë masa për të ulur kostot e transportit publik.

Muajin e kaluar, Gjermania lançoi një biletë mujore të pakufizuar të transportit publik prej 9 euro që mund të përdoret në transportin lokal dhe rajonal në të gjithë vendin.

Në fund të vitit 2021, Austria prezantoi një ‘biletë klimatike’ me zbritje të konsiderueshme, e vlefshme në të gjitha mënyrat e transportit publik në vend, me qëllimin për të inkurajuar njerëzit që të lënë makinat e tyre në shtëpi.

Klimaticket kushton vetëm 1,095 euro në vit.