Ndodhë në Fushë Kosovë, femra i harron paratë në taksi, një person i merr dhe i murosë 27 mijë euro

Sot rreth orës 19:00, nga hetuesit e stacionit policor të Fushë Kosovës, është arrestuar një person për veprën “Shpërdorim i pasurisë së huaj”.

Rasti është raportuar me datën 21.09.2022,  pasi që ankuesja ka vërejtur se i mungon një çantë (me dokumente personale dhe para të gatshme 18000 euro), të cilën dyshonte se e kishte harruar në një taksi me të cilin kishte udhëtuar për në Fushë Kosovë.

Ka qenë puna e hetuesve policorë ajo që ka rezultuar me identifikimin e personit të dyshuar si dhe arrestimin e tij.

Pjesë e veprimeve policore ka qenë edhe kontrolli i vendbanimit të personit të dyshuar, ku në një depo, të murosura janë gjetur dhe sekuestruar një shumë parash (rreth 27000 euro).

Personi i dyshuar, A.R. mashkull 25 vjeç, pas përfundimit të procedurave të nevojshme policore, me vendim të prokurorit është dërguar në mbajtje, ndërkohë që, konform procedurave, palës së dëmtuar i është kthyer shuma e saj e parave.