Janusz Bugajski

Ndërsa lufta e Rusisë po dështon, trazirat e brendshme po intensifikohen

Nga Janusz Bugajski, The Hill

Dështimi ushtarak në Ukrainë po dëmton stabilitetin e shtetit rus. Kremlini është përpjekur të fshehë humbjet e tij në luftë për të parandaluar reagimet negative të brendshme, por realiteti i dështimit po bëhet gjithnjë e më i dukshëm, së fundmi me tërheqjen e trupave rusë nga Khersoni.

Ushtria ruse humbi betejat për Kievin, Kharkivin dhe Khersonin dhe vazhdon të humbasë terren në territoret e tjera të pushtuara. Humbjet e saj në luftë janë të mëdha, me një vlerësim prej mbi 80,000 të vdekur, të plagosur ose që janë kapur rob, duke i shtuar faktit se mijëra avionë dhe tanke janë shkatërruar.

Kritikat e brendshme ruse mbi planifikimin dhe zhvillimin e luftës janë rritur pavarësisht censurës së rreptë shtetërore.

Edhe ish-komandantë të lartë ushtarakë e kanë kritikuar operacionin. Gjenerali Leonid Ivachov, një figurë prestigjioze në Shtabin e Përgjithshëm Sovjetik, ka denoncuar politikën e vendosjes së formacioneve të ndryshme private përkrah ushtrisë së rregullt.

Ivashov madje deklaroi se “Rusia do të pushojë së ekzistuari” nëse vazhdon luftën. Igor Girkin, ish-“ministri i mbrojtjes” i Republikës Popullore të Donetskut ka pohuar se në Rusi po krijohet një situatë revolucionare.

Moska po zhvillon një luftë imperialiste gjithnjë e më jopopullore, fronti i betejës po shembet dhe liderët e vendit janë shkëputur nga realiteti.

Sipas Girkin, Putini po qëndron në pushtet për të parandaluar betejat e elitës që do të përshpejtonin shpërbërjen e Rusisë.  Kritika të tilla janë përforcuar nga ushtarakët që po sulmojnë hapur komandantët rusë për mediokritetin dhe frikacakët e tyre, raporton abcnews.al.

Të paktën një duzinë oligarkësh rusë kanë vdekur në rrethana të pashpjegueshme, duke çuar në spekulime nëse ata ishin kundër luftës dhe të gatshëm për të mbështetur liderët alternativë ose nëse ata kryen vetëvrasje për shkak të humbjeve ekonomike.

Një prej tyre është Ravil Maganov, kryetar i bordit të kompanisë më të madhe private ruse të naftës Lukoil, një nga pak kompanitë ruse që ka kritikuar pushtimin e Ukrainës.

Mosmarrëveshjet mes institucioneve të sigurisë janë rritur si kërpudha. Yevgeniy Prigozhin, i cili kontrollon grupet Wagner, ka kritikuar komandantët ushtarakë të Rusisë dhe ministrin e Mbrojtjes Sergei Shoygu dhe shefin e Shtabit të Përgjithshëm Valery Gerasimov.

Wagner ka pësuar humbje të konsiderueshme në Ukrainë dhe ka rekrutuar të dënuar në burgjet ruse në këmbim të amnistisë.

Udhëheqësi çeçen dhe besnik i Putinit, Ramzan Kadyrov gjithashtu ka sulmuar hapur liderët ushtarakë të Rusisë për paaftësi dhe mungesë të angazhimit. Kritikat e Kadyrov dhe Prigozhin tregojnë një fragmentim të thelluar midis udhëheqësve pro luftës.

Përplasjet mes kontraktorëve të rregullt ushtarak dhe privatë kanë shpërthyer gjithashtu. Mes humbjeve masive, mungesave logjistike dhe tërheqjeve, konflikte të tilla të brendshme mund të përshpejtojnë rebelimet.

Mobilizimi i parë masiv i Rusisë që nga Lufta e Dytë Botërore ka provokuar pakënaqësi.

Pothuajse 1 milion burra u larguan nga vendi për të shmangur mobilizimin dhe disa mijëra u arrestuan në protestat kundër luftës në më shumë se 50 qytete. Shumë janë përpjekur të dezertojnë dhe janë përballur me paraburgim ose ekzekutim. Lufta do të ketë një efekt shkatërrues në rajonet e Rusisë, fondet e të cilave po pakësohen për të paguar për mobilizimin.

Mobilizimi joproporcional dhe viktimat po përkeqësojnë një sërë ankesash në Kaukazin e Veriut dhe republikat e tjera kombëtare.

Opozita me bazë në Moskë dhe demokratët në mërgim janë të paaftë të transformojnë një perandori në një shtet demokratik.

Këmbëngulja e tyre për të mbajtur Rusinë në kufijtë e saj aktualë shihet me dyshim tek jo-rusët dhe rajonalistët. Kjo e lë terrenin të hapur për zëra alternativë, veçanërisht për kombet dhe rajonet që kërkojnë pavarësi, duke përfshirë Kombet e Lira të Post-Rusisë të krijuara së fundmi.

Duke mbledhur aktivistë emigrantë nga disa kombe dhe rajone, duke përfshirë Siberinë, Kaukazin e Veriut dhe Veriperëndimin e Rusisë, ata po i japin zë aspiratave të shtypura prej kohësh për çlirim.

Sulmet e Kremlinit ndaj nismave të tilla nënvizojnë frikën e tij nga sfidat në rritje ndaj sundimit të Moskës, ndërsa Rusia po përballet me humbje në Ukrainë.