Muharremaj: Personi i infektuar nga Suhareka erdhi nga Mali i Zi, po mbahej në konvikte
Edhe tre raste të reja janë shënuar sot me coronavirus në Kosovë duke e çuar kështu numrin total të të infektuarve në 227.
Njëri nga rastet e konfirmuara sonte është nga komuna e Suharekës.
Kryetari i kësaj komune, Bali Muharremaj ka thënë se personi në fjalë ka punuar tash e një kohë dhe se ka qenë i vendosur në Qendrën e Studentëve në Prishtinë.
Ai ka kërkuar edhe një herë nga qytetarët që të jenë të kujdesshëm dhe të mos kenë panik.
“Informacioni i fundit tregon se e kemi edhe një rast pozitiv nga Komuna e Suharekës me virusin Covid-19 dhe ai gjendet në Qendrën e Studentëve në Prishtinë, ku i janë marrë rezultatet sepse ka ardhur nga jashtë vendit.
Ky person ka punuar tash e sa kohë në Mal të Zi dhe nuk ka qenë i pranishëm në territorin tonë.
Pra, situatën po e analizojmë me kujdes dhe nuk ka nevojë për panik.
Ju lutemi qëndroni në shtëpi dhe respektoni rregullat e institucioneve përkatëse”, ka shkruar ai në Facebook.
