Molliqaj për planin franko-gjerman: Kurti solli në jetë fantazmat që dikur i refuzoi Kosova
Kryetari i PSD-së, Dardan Molliqaj ka adresuar kritika ndaj kryeministrit Kurti dhe Vetëvendosjes në lidhje me procesin e dialogut.
Me anë të një postimi në Facebook, Molliqaj ka thënë se Kurti “ka sjellë në jetë fantazmat” e vjetra që dikur refuzoi Kosova.
“Çka refuzoi DIKUR pala e Kosovës (Vizner (SHBA), Ischinger (EU) dhe Harcenko (Rusi) propozimi i dy Gjermanive – 2007), e edhe më kritike ndaj tyre ishte VV-ja, SOT është pozicioni bazë i kësaj të fundit”, ka shkruar Molliqaj.
Sipas kreut të PSD-së, me anë të këtyre modeleve normalizohet njohja e Asociacioni formohet.
Postimi i Molliqajt, pa ndërhyrje:
Çka solli në jetë Kurti janë fantazmat e vjetra që refuzoi dikur Kosova.
Çka refuzoi DIKUR pala e Kosovës (Vizner (SHBA), Ischinger (EU) dhe Harcenko (Rusi) propozimi i dy Gjermanive – 2007), e edhe më kritike ndaj tyre ishte VV-ja, SOT është pozicioni bazë i kësaj të fundit.
Modeli i dy Gjermanive zbret në Kosovë, në formën e tij të zbehur. Humbjet na shpallen fitore, sepse pushteti prej 50.28% manipulon faktet.
Mosnjohja normalizohet, Asociacioni formohet, konflikti spostohet, problemi thellohet. E tërë këtë na tregtojnë si fitore.
Dokumente e plane, drafte e propozime. Sillemi rreth projekteve të vjetra, që i riciklon qeveria e re, mbështjellur me një letër vezlluese, me një fjongo në ballë.
Këta harrojnë që Kosova ka memorie për ngjarjet. Nuk i kemi djegur kujtimet me ardhjen e pushtetit të ri. As rezitencën kundër okupimit. Prandaj rezistenca vazhdon.
