Molliqaj ia kujton Kurtit letrën ku i kishte thënë Mustafës së largimi i Konjufcës është ‘ujdi monarkësh’
Kryetari i PSD-së, Dardan Molliqaj, ka reaguar pas raportimeve për arritjen e marrëveshjes ndërmjet LVV-së dhe LDK-së për bashkëqeverisje.
Ai e ka publikuar edhe letrën e Kurtit të cilën para 10 ditësh ia dërgoi Mustafës, ku thoshte se do të ishte ujdi monarkësh nëse shkarkohet Glauk Konjufca, raporton Ballkani.info.
Postimi i plotë i Molliqajt:
Ujdi monarkësh
Kurti, në letrën dërguar Mustafës 10 ditë më parë, e quajti “ujdi monarkësh” e “ogur fatkeq” largimin e Konjufcës nga Kryetari i Kuvendit.
Pikërisht këto fjalë sot, sipas raportimeve në media, i gëlltiti Kurti teksa arrinë marrëveshje me Mustafën. Ai po sillet si monark, me fjalë të veta, po delegjitimon institucionet demokratike me ujdinë e tij monarkiste dhe po bën kurban Konjufcën me të vetmin qëllim që të vij në pushtet.
Popullistët që vijnë në qeveri kanë një të përbashkët me elitat politike që i kritikojnë për korrupsion dhe marrëveshje të dëmshme. Në fund, ata arrijnë marrëveshje të njëjta si paraardhësit e tyre e gjithmonë arsyetohen me qëllimin e tyre dashamirë. Popullistët duke thënë për të mirën e popullit e elitat politike për të mirën e shtetit.
Popullistët si Kurti me elitat politike si paraardhësit e tij në pushtet nuk kanë dallim në qëllimet e tyre. Këta, teksa i ndryshojnë fjalët për më pak se 10 ditë, nuk sjellin ndryshim por vetëm stagnim.
