Ministrja e Financave, Hykmete Bajrami pas miratimit të buxhetit të rishikuar të Kosovës, ka bërë të ditur se menjëherë do të ekzekutohen pagesat për masat e pakos së ndihmës në kohën e pandemisë.
Bëhet fjalë për masat 170 euro, 130 euro, skemës sociale, etj.
Postimi i plotë i ministres:
Të dashur qytetarë,
Kam kënaqësi që të ju njoftoj që sapo miratuam buxhetin e rishikuar për vitin 2020.
Falenderoj të gjithë deputetët e Kuvendit të Republikës së Kosovës që votuan PËR, duke mundësuar kështu fillimin e implementimit të Programit për Rimëkëmbje Ekonomike.
Si Ministri e Financave, kemi bërë të gjitha përgatitjet e nevojshme që menjeherë pas dekretimit të ligjit nga Presidenti i Republikës së Kosovës, të ekzekutojmë pagesat për masat e pakos së kaluar.
Përmes buxhetit të rishikuar, jemi siguruar që të ruajmë stabilitetin makrofiskal, të financojmë sektorin e shëndetësisë për t’u përballur me sukses me pandeminë COVID19, dhe të rigjallërojmë aktivitetin ekonomik në vendin tonë.







