Ehat Miftaraj, drejtor ekzekutiv në Institutin e Kosovës për Drejtësi (IKD), tha se kemi numër të madh të ministrave, deputetëve e zyrtarëve tjerë të lartë, të cilët nuk e kanë deklaruar pasurinë ose kanë bërë deklarim të rremë. Ai tha se ka shumë ministra me aktakuza, të cilët në mëngjes shkojnë në gjykatë e pasdite në punë.

Sipas tij, kur është hartuar Kodi Penal është përcaktuar në mënyrë të qartë se rastet e deklarimit të rremë, i pandehuri dënohet me gjobë dhe me burg.

“Do të thotë, në rastet kur me Kod, Kuvendi dëshiron t’i japë diskrecion gjykatës nëse dëshiron ta dënojë me burgim ose me gjobë, e shkruan: me gjobë ose me burg. Në rastet kur shkruhet me gjobë dhe me burg, nuk ka më diskrecion, do të thotë dyjat. Pjesa tjetër është që gjyqësori do të duhej të ushtronte mandatin e tij ia jep Kushtetuta dhe Ligji në balancën e pushteteve. Nëse e marrim për bazë vetëm në tri vitet e fundit, ne kemi pasur numër të madh të ministrave, të deputetëve, të zyrtarëve të lartë, të cilët ose nuk e kanë deklaruar pasurinë ose kanë bërë deklarim të rremë. Kjo në radhë të parë tregon mosrespekt jashtëzakonisht të madh të këtyre zyrtarëve të lartë publik ndaj pozitës që e mbajnë”, tha Miftaraj në “Tempus“.

Ai thotë se në vendimin për emërimin e një ministri, theksohet se duhet deklaruar pasuria.

“Në kohën kur kryeministri e emëron një ministër, e lëshon një vendim dhe ai vendim i ka katër rreshta dhe është pika.1. Filan fisteku emërohet ministër në këtë ministri. Ministri e merr mandatin nga kjo datë deri këtu dhe pika e tretë thuhet që ministri x-ministri e ka për obligim të deklarojë pasurinë brenda afatit ligjor dhe vendimit në fuqi. Do të thotë, secili ministër që e merr pozitën e ka këtë vendim”, tha Miftaraj.

Sipas tij, kur ta beson Qeveria këtë detyrë, duhet ta respektojë atë vendim. Por, përkundrazi kemi shumë ministra që nuk e kanë deklaruar pasurinë.

“Përkundrazi, kemi shumë ministra që nuk e kanë deklaruar pasurinë dhe ne sot ballafaqohemi pothuajse në baza ditore nëpër gjykata. Këta ministra, në mëngjes shkojnë në gjykatë, pasdite në vendet e tyre të punës. Çka është më e keqe është se kjo e dëshmon edhe brishtësinë e sistemit gjyqësor, sepse ndryshe po trajtohen ministrat nga ana e gjyqtarëve, ndryshe qytetarët”, tha Miftaraj.

Ai tha se ka raste kur një ministër e merr këshilltarin e kabinetit në seancë gjyqësore apo asistentin, e shkojnë me vetura zyrtare. Këto veprime thotë se e ulin besimin e qytetarëve në institucionet publike.

Drejtori i IKD-së tha se nëse do të kishim një gjyqësor efikas, ministrat, deputetët e zyrtarët e tjerë publikë, do të mendoheshin 10 herë para se ta deklaronin pasurinë, mos ta deklaronin apo të harronin ta deklaronin atë.

“Nëse një ministër harron se ka pasur një biznes, atëherë unë nuk e di ai ministër a duhet të jetë ministër sepse ka probleme shumë serioze me demencën apo me ndonjë sëmundje të alzheimerit. Si mund të harrosh se ke një biznes i cili gjeneron dhjetëra-mijëra euro në vit”, tha Miftaraj. /BetimipërDrejtësi