Me këtë foto Obama e uron Biden pas zgjedhjes president
Ish-presidenti amerikan Barack Obama është shprehur krenar me fitoren e Joe Biden në zgjedhjet presidenciale. Biden shërbeu si nënpresident në administratën Obama.
“Nuk mund të isha më krenar për të uruar presidentin tonë të ardhshëm, Joe Bide, dhe Zonjën e Parë, Jill Biden”, shkruan Obama i cili gjithashtu ka uruar Kamala Harris, për zgjedhjen e saj historike.
“Në këto zgjedhje, në rrethana të paparapara më parë, amerikanët dolën në votime më shumë se kurrë. Kur secila votë të numërohet, presidenti i zgjedhur Biden dhe nënpresidentja e zgjedhur Harris do të kenë shënuar një fitore vendimtare dhe historike”, thotë ai.
Obama thotë se Amerika është me fat që do të ketë një president si Joe Biden.
“Kur ai të udhëheq me Shtëpinë e Bardhë në janar, ai do të përballet me sfida të jashtëzakonshme me të cilat nuk është përballur asnjë president më parë, një pandemi, një ekonomi dhe sistem i drejtësisë i pabarabartë dhe demokraci në rrezik”.
Obama tha se ai dhe bashkëshortja e tij, Michelle do të qëndrojnë pranë dhe do të mbështesin presidentin e ri amerikan.
Demokrati Joe Biden është zgjedhur presidenti i 46’të i Shteteve të Bashkuara të Amerikës pas një gare të ashpër me republikanin, Donald Trump, i cili synonte të merrte edhe një mandat të dytë si njeriu i parë i Amerikës.
Biden në gjithë procesin e numërimit të votave ka qenë duke prirë, derisa vendimtare ka qenë përmbysja që i ka bërë në Trumpit në shtetin e Pensilvanisë.
Tashmë Biden ka mbi 270 vota elektorale, të cilat ia mundësojnë hyrjen në Shtëpinë e Bardhë si i pari i Amerikës.
Përgjatë historisë, Joe Biden, njihet për afërsinë dhe miqësinë shumë të ngushtë me shqiptarët, sidomos me Kosovën.
Përgjatë viteve të 90’ta, ai ka qenë avokues i madh i lirisë së Kosovës dhe kishte kërkuar me ngul që SHBA të bombardonte Serbinë.
