Mbrojtja e Haradinajt njofton për çështjet që do të ngrejë në konferencën para apelit
Mbrojtja e Nasim Haradinajt, përmes një parashtrese të datës 27 qershor, ka njoftuar panelin e Apelit për çështjet që do të ngrejë gjatë konferencës para apelit që pritet të mbahet me 5 korrik.
Në këtë shkresë thuhet se mbrojtja e Haradinajt thekson se ‘Njoftimi i Prokurorisë dhe kërkesa për mbajtjen e paraburgimit’ është i datës 17 qershor 2022, por nuk është shpërndarë deri më 20 qershor 2022.
“Prandaj, Mbrojtja e Haradinaj konsideron se afati i fundit për parashtresat e mbrojtjes në këtë pikë është 30 qershor 2022 në përputhje me ‘Urdhrin për caktimin e një konference para ankesës dhe për çështje të ndërlidhura’ dhe do të paraqesë parashtresa të veçanta për këtë çështje në përputhje me rrethanat”, thuhet në këtë shkresë.
Sipas shkresës, mbrojtja e Haradinajt kërkon të ngrejë 2 çështje të tjera, njëra prej të cilave është trajtuar në parashtresa me shkrim dhe për këtë arsye është ngritur për qëllime të qartësisë.
“Së pari, Mbrojtja e Haradinajt pohon se numri i fjalëve për përmbledhjen e ankesës prej 12,000 fjalësh është i pamjaftueshëm në rastin konkret dhe për këtë arsye ka paraqitur një kërkesë për vazhdimin e të njëjtës. Mbrojtja për z. Haradinaj është e gatshme dhe në gjendje të bëjë parashtresa të mëtejshme gojore duke plotësuar kërkesën me shkrim nëse Paneli dëshiron ta dëgjojë të njëjtën gjë”, thuhet në këtë shkresë.
Tutje, thuhet se mbrojtja e Haradinajt dëshiron të kërkojë qartësi nëse ankesa thelbësore do të shqyrtohet përmes parashtresave me gojë dhe me shkrim, apo nëse mbrojtjes do t’i lejohet të paraqesë vetëm parashtresa me shkrim.
Ata thonë se mbetet në dispozicion të Panelit për të bërë parashtresa gojore për këtë çështje nëse kërkohet.
“Mbrojtja e Haradinajt nuk kërkon të ngrejë ndonjë çështje të mëtejshme specifike përveç atyre të cituara më lart, megjithatë, ruan të drejtën për t’iu përgjigjur çdo çështjeje të ngritur nga palët e tjera dhe për të ndihmuar Panelin për çdo çështje tjetër që rrjedh gjatë rrjedhës së Konferenca e Apelit”, thuhet në fund të shkresës.
Ndryshe, Hysni Gucati dhe Nasim Haradinaj më 18 maj u shpallën fajtorë dhe u dënuan me nga 4 vjet e gjysmë burgim dhe gjobë në shumën prej 100 euro, për veprat penale që ndërlidhen me pengimin e administrimit të drejtësisë.
Hysni Gucati së bashku me Nasim Haradinaj, akuzoheshin për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.
“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara.
Gucati dhe Haradinaj ngarkoheshin se kanë bërë komente nënçmuese kundër dëshmitarëve të mundshëm dhe në mënyrë të përsëritur shprehen synimin e tyre për të dëmtuar punën e Dhomave të Specializuara.
“Me këto veprime, z. Gucati dhe z. Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së”, thuhej në njoftimin e Dhomave të Specializuara të Kosovës./BetimipërDrejtësi
